Мемнан издательство пӧртын кушан верлаҥмыжым ынде шукынжо палаш тӱҥалыныт. Эсогыл ӧрдыж кундемлаште илыше марий-влакат шочмо йылме дене савыктыме книгам, журнал-влакым, пытартыш жапыште пырдыжеш сакышаш календарьым налаш толыт. Тидыже мемнам куандарыде ок керт.

Кодшо кечылаште ик чолга марий Угарман гыч тольо. Палыме лийна: отставкысе офицер Алексей Федоров. Шкеже Удмурт Республикысе Кӱшыл Иж-Бодья лӱман марий ял гыч. Шке жапыштыже Угарман олаште военный училищым тунем лектын да кумда элнан тӱрлӧ лукыштыжо служитлен. Но утларакшым Мӱндыр Эрвелне лийын. Армий гыч увольнятлалтмекыже, ешыж дене Юл серысе Угарман олашке толын, вераҥын. Кеч-кушто илен гынат, шочмо йылмым, культурым, йӱлам аралаш тыршен, шымлаш йӧным муын. Тидланже, мутат уке, марла книга да журнал, газет-влак полшат. Мемнан «Ончыко» журналнамат шкеже налеш да шочмо ялышкыжат почто гоч подписке дене колта.

Алексей Николаевич дене чумыр коллектив шокшын мутланыш. Пеш оҥай марий айдеме, келге шинчымашан. Савыктышыштына ыштыше пашаеҥ-влакын шуко йодышыштлан вашештыш. Кажнылан тиде вашлиймаш ушеш кодшо ыле. Пытартышлан икмыняр книгам, «Ончыко», «Кече-Солнышко» журнал-влакым нале, «У сем» курыкмарла журналымат ыш шӱкал, «Яра жапыштем Юл сер марий-влакын йылмыштым тунемаш тӱҥалам» мане.

Тыгай вашлиймаш кажнылан пеш пайдале.  А ме Алексей Федоровлан марла изданий-влак дене кылым эшеат пеҥгыдемдаш тыланена.