Марий Элын калык писательже В.Абукев-Эмгак лÿмеш ыштыме «Ший памаш» фондын 2017 ийыште самырык автор-влаклан увертарыме сылнымут конкурсым иктешлыме.

Эн сай поэзий - «Кинде-шинчал» премий дене Елена Годунова ден Татьяна Япаева палемдалтыныт;

Эн сай прозо - «Ошкеча» премий дене - Татьяна Труфанова;

Эн сай теле-, радиожурналист паша, блогер - «Канде толкын» премий дене - ВГТРК-н «Марий Эл» ГТРК филиалжын радиовещаний службыжын корреспондентше Алеся Владимирова ден «Марий Эл ТВ»-ын корреспондентше Лира Кудряшова.

Чаманен каласаш логалеш, «Кайыккомбо кашта» (эн сай драматургий) да «Почылтшо чон» (эн сай журналист паша) йыжыҥлаште премийым нигö сулен кертын огыл. Сандене самырк возышо-влакым ÿжына, 2018 ийыште «Ший памаш» конкурсыш чолганрак ушныза. Кö тений сеҥышыш лектын огыл гын, шушаш ийын утларак пашам ыштыза. Тыланда пöлеклалтше, сылнымут вийдам кумылаҥдыше тиде усталык таҥÿчаш вийым гына налеш. Конкурсын положенийжым "Ончыко" журналыште, "Марий Эл" ден "Кугарня" газетлаште, да сайтыштына идалык тÿҥалтыште савыктена.

 

Ший памаш конкурсын оргкомитетше.