2-8 июльышто Шернур районысо Марисола школышто Марий самырык тукымын черетан Х слётшо эртен. Ушештарена, Россий кӱкшытан Марий самырык тукым слёт 2009 ий гыч эрта.

Ты гана слётыш 18 гыч 30 ияш марте 70 утла еҥ погынен ыле. Ты кечылаште слётын участникше-влак лекцийлам колыштыныт, практик занятийлам, палыме еҥ-влак дене вашлиймашым, мастар-класс-влакым эртареныт.


А 4-ше июль кастене Марисола клубышто сылнымут кас эртыш. Тудым сылнымутчо, Марисола школын ончычсо чолга туныктышыжо Д.Рычкова вӱдыш да Марисола кундемын шочшыжо-влак мастар поэтессе З.Дудина, С.Архипова да прозаик Ю.Соловьев дене палдарыш да шкеныштымат сценыш ӱжӧ. Уна-влак шке возымышт дене палдарышт, тачысе сылнымут нерген мутым тарватышт да марий книгам ончыкыжат лудын шогаш ӱжыч.

Коеш, слётыш погынышо ӱдыр-рвезе-влак марий сылнымутым лудыт да эскерат. Вет арамлан огыл йодышышт-влакат пӱсӧ, ончыкылык верч тургыжланышан ыльыч. Тугеже сылнымут тӱня нунылан лишыл. Нуно ончыкыжымат марий сылнымут дене пеҥгыде кылым кучаш да молымат кумыландаш тӱҥалыт манын ӱшанена.

 Марий самырык тукымын слётышт. 4 июль 2018 ий.

С.Архипован фотожо-влак.