5 августышто Морко районысо Шлань ялысе тӱвыра пӧртыштӧ калык образованийын отличникше, Россий писатель-влак ушемын, Нижневартовск писатель-влак содружествын еҥже Роза Салахын «Братья» черетан книгажын презентацийже эртен. Калык тушко ятыр погынен ыле, шке землякшым моткоч порын вашлийыч, верысе сылнысем мастар-влакын чапле мурышт йоҥгалте.

Роза Арслановна Миклыш (Салах) Шлань ялыште шочын (1937). Изинекак ача-ава деч посна кодын. Ачаже Кугу Отечественный сарыште вуйжым пыштен. Римма акаж дене пырля йочапӧртыштӧ кушкыныт. Йошкар-Оласе педучилище деч вара Н.К.Крупская лӱмеш Марий пединститутын историй да филологий факультетшым тунем лектын, ӱмыржӧ мучко туныктымо пашаште тыршен.

А кызыт тудо Нижневартовскышто ила, кеҥежым 80 ияш чолга кова утларакше Новочебоксарскысе дачыштыже эртара. Жапше лийме семын шочмо кундемышкыжат толын кая.

Роза Салах 12 книган авторжо: «От мира сего», «Радуга», «Детдомовец» «Пташки и зверушки» да молат.

«Братья» книгаже Роза Арслановнан тукымжо дене кылдалтын да ачажын иза-шольыжо, нунын тукымышт нерген радамла, кажныжлан мо пӱралтше ӱмырышт нерген каласкала. Шлань калыклан тиде моткоч шерге книгашке лекте. Вашлиймашын кажне унаже мӧҥгыжӧ книга полек дене пӧртыльӧ.

Книгам Марий книга савыктыш порт луктын.

  

 

Роза Арслановна Салах ончыл радамыште марий тувыр дене шинча.