20 сентябрьыште курык марла лектын шогышо «У сем» журналын тӱҥ редакторжо, Марий Эл Республикын сулло журналистше Людмила Петровна Ягодарова 60 ияш лӱмгечыжым палемда.

Курыкмарий район Сарансола ялын ӱдыржӧ Церкансола кыдалаш школышто тунеммыж годымак сылнымутлан кумылаҥын, литературный кружокыш коштын. Н.К.Крупская лӱмеш марий кугыжаныш педагогический институым тунем лектын. Курыкмарий икшыве-влаклан «Йамды ли» газет лекташ тӱҥалмеке, уло кумылын журналист ешыш ушнен да кужу жап «Ямде лий!» республиканский йоча газетыште пашам ыштен. 2013 ий гыч «У сем» журналым вуйлата.

Пагалыме Людмила Петровна, лӱмгечет дене уло кумылын саламлена да шӱдӧ ияш тумо гай пеҥгыде тазалыкым, кужу ӱмырым, марий сылнымутым вияҥдыме пашаштет кугу кӱкшытыш шуаш тыланена.

Снимкыште: "У сем" журналын ончычсо редакторжо М.Кудряшовым шарныме лӱмеш куштылго атлетике кроссын организаторжо Л.Ягодарова ден А.Замков тунемше-влак дене пырля (2017).