Богданова Зоя Семеновна. Шӱм-чон сескем: повесть, ойлымаш, илыш сӱрет. - Йошкар-Ола: «Марий книга издательстве» савыктыш пӧрт, 2017. - 240 с.

Кужэҥер кундемын ӱдыржӧ, Параньга кундемысе Элпанур школышто пеш шуко ий йоча-влаклан шинчымашым пуышо Зоя Семёновна Богданова сылнымутланат моткоч шӱман. Ойлымаш-влакше периодикыште шагалак огыл савыкталтыныт. А «Ончыко» журналым лудшо-влак «Шӱм-чон сескем» чонпогыж дене палыме лийын кертыныт. Тудым автор «Илышем гыч повесть» манын лӱмден ыле. Ты произведенияк З.С.Богданован лудшо-влаклан темлыме книгаштыже  рӱдӧ верым налеш.

Автор марий сылнымут йылмым моткоч сайын пала, повесть ден ойлымашлаштыже, сылнымутан очерклаштыже сюжетым моштен чоҥа, геройжо-влакын койыш-шоктышыштымат пеш сайын почын пуа. Икманаш, тудын сылнымут усталыкше раш палдырна. Возымаштыже тудо шке илышыж нерген каласкалымыж гоч иктаҥаш тукымжын эртыме суапле илыш корныжым да паша надыржым акла, тудын дене уло шӱмжӧ вошт кугешна, у тукымын пӱрымашыж верч тургыжлана.

Книгам Финляндийысе М.А.Кастрен ушемын полшымыж дене савыктыме