Марий Элын калык писательже В.Абукаев-Эмгак лÿмеш марий сылнымутъеҥ В.Красновын почмо фондшо ынде ныл ий почела «Ший памаш» конкурсым эртара. 2016 ийыште жюрилан ончаш пуымо паша-влакым иктешлыме да 24 декабрьыште лауреат-влакын лÿмыштым увертарыме.
А тыгай куанле сомылжо Какшан серысе Амстердам площадьыште верланыше Усталык ушем-влакын пєртыштышт эртыш. В.Абукаев-Эмгак лўмеш поро кумылым ончыктышо «Ший памаш» сылнымут фондым ыштыше Василий Краснов, фондын попечительский пашажым виктарыше, писатель Юрий Соловьёв да Марий кугыжаныш университетын профессоржо Любовь Абукаева конкурсышто тений сеҥыше-влаклан йÿла почеш дипломым да окса премийым кучыктышт.
Лауреат-влак дене палдарена.
Эн сай поэзий пашалан «Кинде-шинчал» премий дене Вера Гордеева ден Алёна Яковлева палемдалтыныт;
эн сай журналист пашалан — «Виш чон» премий дене «Марий Эл» газетын корреспондентше Лидия Шабдарова ден «Кугарня» газетын пашаеҥже Татьяна Айтова;
эн сай теле-, радиожурналист да блогер пашалан «Канде тул» премий дене самырык блогер Николай Любимов ден радиожурналистке Татьяна Соловьёва палемдалтыныт.
Чаманен каласаш логалеш, эн сай прозо паша ден пьесе (драматургий паша) тений лийын огытыл. Сандене самырык возышо-влакым ÿжына: 2017 ийыште «Ший памаш» конкурсыш чолганрак ушныза! Тыланда пöлеклалтше, сылнымут вийдам кумылаҥдыше тиде усталык таҥÿчаш вийым гына налеш.
Конкурсын вуйверже.
