Ти кечӹвлӓ лошты Чуваш Республикӹн халык писательжӹ, учёный-академик, пӓлӹмӹ общественный деятель дӓ просветитель Михаил Николаевич Юхма «Мары книгӓ издательство» издательский пöрт» кугижӓншӹ унитарный казённый предприятишкӹ толын ыльы. Предприятин директоржы Ю.Соловьев стöл йӹр шӹнзӹн хытырымы годым анзыкылашы пӓшӓвлӓ, книгӓвлӓм лыкмы годым иктӹ-весӹ доно кӹлӹм кычымы, палшен шалгымы гишӓн шанымашыжым келесен, «У сем» журналын тӹнг редакторжы Л.Ягодарова суасламары дӓ мары писатель дон поэтвлӓ гишӓн журнал гач пӓлдӓрен шалгымы, лыдшывлӓм яжо сӹлнӹшаявлӓ доно сусуэмдӹмӹ шотышты шаям виден.ÿö
Мӓ пӓленӓ, М.Н.Юхма — кокшÿдӹ утла проза, поэзи, драматурги, очерк дӓ публицистика книгӓвлӓн авторышты. Тӹдӹ первишӹ болгар дӓ суасламары халыквлӓн историштӹм келгӹн шӹмлен. Сӹлнӹшая мастарын книгӓвлӓжӹм мир вӹлнӹшӹ шукы йӹлмӹшкӹ сӓрӹмӹ. Михаил Николаевич сирӹмӹ произведенивлӓжӹ гач ӹшкӹмжӹм талантан лирик дӓ романтик, эдемвлӓн кöргӹ сӹрӹштӹм дӓ сӹнӹштӹм келгӹн пӓлӹшӹ психолог, философ, яжо художник дӓ ӹлӹмӓшӹм цилӓ монгыр гӹц шїмлен дӓ ужын мыштышы эдем семӹнь анжыкта.
М.Н.Юхмалан халыквлӓ лошты творческий дӓ культура кӹлӹм цаткыдемдӹмӹ шотышты кого пӓшӓм ӹштӹмӹжӹлӓн «Мары Эл Республика культурын заслуженный пӓшӓзӹжӹ» лӹмӹм пумы. Писатель техеньок кÿкшӹ лӹмӹм Чуваш, Татарстан дӓ Удмурт республикївлӓштӹт нӓлӹн. Мары Эл Республикїштӹнӓ тӹдӹн пӓшӓжїм шӹмлӹзӹ, халык писатель Ким Васин, халык писательвлӓ Миклай Рыбаков, Александр Юзыкайн, лӹмлӹ поэт Валентин Колумб кÿкшӹн ӓкленӹт.
Михаил Николаевич Юхма «У сем», «Ончыко» журналвлӓ доно кїлїм кыча. Кырык мары йӹлмӹ доно «Кловой пикш» исторический роман, «Ма техеньӹ ирӹк» пьесӹвлӓ, изирӓк иӓшӓн лыдшывлӓлӓн «Шӓргӹ книгӓ» шайыштмаш семӹнь повесть, «Пÿрнеске дӓ тӹдӹн тӓнгвлӓжӹн цÿдӓ приключенивлӓ» ямак-повесть книгӓвлӓжӹ лӓктӹнӹт. Пиш кого шытырым сӓрӹмӹ пӓшӓшкӹ писатель, драматург, краевед, «У сем» журналын молнамшы тӹнг редакторжы Михаил Кудряшов пиштен. Нӹнӹ коктын иктӹ-весӹштӹ доно цаткыды кӹлӹм кыченӹт, суасламары дӓ мары халыквлӓн сӹлнӹшаяштым лыдшывлӓ лошкы шӓренӹт.
Л.Ягодарова йӓмдӹлен.