Тене «Россий писатель ушем» общероссийский общественный организацин Мары Эл Республикӹштӹшӹ региональный отделенижӹ поэт, прозаик Чалай Васлийӹн (Василий Фёдорович Чегаев) шачмыжылан 100 и теммӹ лӹмеш сӓмӹрӹк ӹдӹр-ӹрвезӹвлӓ лошты конкурсым увертӓрен ыльы. Тӹштӹ сакой иготан тыменьшӹвлӓ сирӹмӹ мастарлыкыштым поэзи, проза номинацивлӓштӹ тергенӹт. Писатель ушемӹн председательжӹ С.Д. Архипован попымыжы семӹнь, техень конкурс кудымшы гӓнӓ эртӓрӓлтеш. Тенӓт конкурсышкы шукы пӓшӓ пырен. Сек мастар ӹдӹр-ӹрвезӹвлӓм Творчество союзвлӓн пöртӹшкӹ ÿжӹнӹт дӓ сӓнгӹшӹшкӹ лӓкшӹвлӓм Диплом доно пӓлемденӹт. Тымдышывлӓлӓн Тау шамакан сирмӓшӹм (Благодарность) кычыктенӹт. Мары Эл Республикїн культура, печать дӓ национальность пӓшӓ шотышты министрӹн палшыкалышыжы Г.С. Ширяева тыменьшӹвлӓм конкурсышкы ушнымышты доно кымылангден дӓ анзыкылаат кÿкшӹ кÿкшӹцӹшкӹ шоаш согоньлен.
ӹдӹр-ӹрвезӹвлӓн пӓшӓвлӓштӹм «Россий писатель ушем» общероссийский общественный организацин Мары Эл Республикӹштӹшӹ региональный отделенижӹ дӓ Мары Эл Республикӹн «Мары книгӓ издательство» кугижӓншӹ унитарный казённый предприятижӹ (директор – Ю.И. Соловьев) кÿкшӹн ӓкленӹт. Цилӓ участниклӓн подарка шотеш книгӓвлӓм пумы. «У сем» литературно-художественный дӓ общественно-политический журналын тӹнг редакторжы Л.П. Ягодарова «Пӹзӹкныр кӹдӓлӓш школ» МОБУ-н социальный педагогшы В.В. Васкановалан сӓмӹрӹк йыхым куштымашкы шытырым пиштӹмӹжӹ гишӓн тау шамакым келесен. Ти школын ӹдӹр-ӹрвезӹвлӓ хоть-кыштат соок айыртемӓлтӓт.
Сӓмӓрӹк йыхым сакой конкурсвлӓшкӹ кымылангден шалгымы пӓшӓн лӓктӹшӹжӹ яжо, тӹдӹ сӹлнӹшаям яратышывлӓлӓн соты корным пачын шалга.
Л.Ягодарова йӓмдӓлен.