2018 ин 10 апрельӹн Козьмодемьянск халашты, Яков Эшпай лӹмӓн халык культура центрӹштӹ, и йӹде эртӓрӓлтшӹ «Н.Игнатьев лӹмеш XVIII лыдмаш: «Кырык марывлӓн историштӹштӹ, культурыштышты дӓ образоваништӹштӹ просветительвлӓн рольышты» научно-практический конференци эртен.

Конференци педагог-священник Г.Я. Яковлевӹн (1843-1912) шачмыжылан 175 и шомы лӹмеш эртӓрӓлтӹн дӓ ӹшке йӹржӹ мары йӹлмӹ дӓ сӹлнӹ шая докы кымылан шукы эдемӹм цымырен. Регион кўкшӹцӓн научно-практический конференциштӹ Мары Эл Республикӹн Правительство председательӹн икшӹ заместительжӹ М.З.Васютин, Мары Эл Республикӹн культура, печать дӓ национальность пӓшӓ шотышты  министрӹн заместительжӹ Г.С. Ширяева, Мары Эл Республикӹн образовани ді наука министерствын общий ді дошкольный образовани шотышты управленин начальникшӹ О.М. Майкова кымылангдымы шамакым келесенӹт дӓ йӹлмӹм виінгдӹмӓшкӹ, культурым  анзыкыла шӓрӹмішкӹ, халыкнан историжӹм шӹмлӹмішкӹ кого шытырым пиштӹшӹвлӓм Почётан грамота дӓ Тау шамакан сирмӓшвлӓ доно пілемденӹт.

Сӹлнӹшая мастар В.Красновын Мары Элӹн халык писательжӹ В. Абукаев-Эмгак лӹмеш пачмы «Ший памаш» («Ши вӹдваж») фондшы сӓмӹрӹк ӹдӹр-ӹрвезӹвлӓ лошты ӹнде вӹзӹмшӹ и конкурсым эртӓрӓ.  2017 иэш жюрилін анжаш пумы лыдыш дон шайыштмашвлі лошты Кырык мары кымдемӹн сирӹзӹжӹ Татьяна Труфанован пӓшӓжӓт ылын, тӹдӹ «Эх, ӹлӹмішӹжіт» шайыштмашыжы доно «Сек яжо проза» номинациштӹ сїнгӹшӹшкӹ лӓктӹн.

«Ши вӹдваж» фондын председательжӹ В.Красновын пумы премим дӓ Дипломым «У сем» журналын тӹнг редакторжы Л.П.Ягодарова кычыктен.
МарНИИЯЛИ-н шӹмлӹзӹвлӓжӹ Н.А.Федосеева, С.С.Сибатрова, Г.А.Эрцикова, М.В.Пенькова, МарГУ-н профессоржы, филологи наука кандидат  З.Г.Зорина, МарГУ-н доцентвлӓжӹ, филологи наука кандидатвлӓ Т.В.Янцукова ді Н.М.Краснова профессор, филологи наука доктор Л.П. Васикован тӹнгӓл кодымы пӓшӓжӹм пакыла виктірен шалгат дӓ сімӹрӹк шӹмлӹзӹвлӓм куштымашкы кого шытырым пиштӓт.

«Лингвистика», «Литература», «Исторический наука ді краеведени», «Образовани», «Культура ді искусство» секцивлӓштӹ шукы яжо темывлӓм тӓрвӓтӹмӹ дӓ ланзылымы. Ти научно-практический конференциштӹ кычылтмы материалвлӓм ик сборникӹшкӹ цымырат дӓ пасна книгӓ доно пецӓтлен лыктыт.