2019 ий 15 майыште Марий Элын Т. Евсеев лӱмеш национальный тоштерыштыже палыме прозаик, драматург, журналист, Россий писатель ушемын да Украинысе писатель-влакын национальный ушемыштын еҥже Сергей Крупняков дене усталык вашлиймаш эртен. Тудо “Шонымашын ал мардежоҥжо” маналтын. Мероприятийым унан ачаже, Марий АССР-ын калык писательже да республикысе Кугыжаныш премийын лауреатше А.С. Крупняковын (1919–1994) шочмыжлан 100 ий теммыжлан пӧлеклалтше ончер сынеш эртарыме.

С. Крупняков Марий Элын рӱдолашкыже май тӱҥалтыште Севастополь ола гыч А.С. Крупняковын шочмыжлан 100 ий теммылан пӧлеклалтше мероприятийлаште участвоватлаш толын. Вашлиймаш годым пагалыме уна шкенжын усталык паша корныжо, Аркадий Крупняковын пашажым шуйышо серымсе сомылжо нерген каласкален, кумдан палыме ачаж нерген шергакан шарнымаш дене палдарен.

Сергей Аркадьевич Крупняков 1950 ий 6 апрельыште Бугульма олаште (Татарий) шочын. 1968 ийыште Крымысе Белогорск олаште школым пытарымек, Йошкар-Оласе Н.К. Крупская лӱмеш МГПИ-ш пурен, тудым “англичан йылмым, историйым да обществоведенийым туныктышо” специальность дене тунем лектын. Вара армийыште служитлен, “Ялысе увер” ден “Марийская правда” газетлаште корреспондентлан, республикысе руш драмтеатрыште сылнымут ужашым вуйлатышылан ыштен. 1986 ийыште Севастополь олашке илаш куснымек, Сергей Аркадьевич йоча да самырык-влакын кино-видеостудийыштым вуйлатен. 1996 ийыште тудын икымше романже – “Амазонки” – савыкталтын. Тылеч вара “”Амазонки Таврийские”роман, “Амага” исторический роман да моло возымыжат ош тӱням ужыныт. Сергей Крупняковын усталык пашаштыже посна верым йоча-влаклан теҥыз нерген серыме ойлымаш-влак налыт. С. Крупняков йоча-влаклан тыгак “Золотое перо” йомакым (2010), ачаж дене пырля кум романым возен. Тудо мардежоҥан романтикым да теҥыз дене кылдалтше тошто илышым уло кумылын йӧратыше айдеме. Тудын ыштыме, Фиолент да Балаклава мыс сынеш вераҥдыме ал мардежоҥан “Гикия” яхтын силуэтше мемнан кызытсе, чылажымат шотлен да аныклен илыме жапыштына романтизмын шке шотан сӱретышкыже савырнен.

Писатель С. Крупняков дене вашлиймаш шокшо, йолташле шӱлышеш эртен.

Тылеч ончыч С.Крупняков Марий книга издательстве савыктыш пӧртын коллективше дене вашлийын. Вет тений издательстве писатель ачажын шӱдӧ ияш лӱмгечыж вашеш "Царев город" романжым савыктен луктын.