21 майыште «Марий книга издательстве» савыктыш пӧртын пашаеҥже-влак И.С.Палантай лӱмеш республикысе тӱвыра да сымыктыш колледжын студентше да преподавательже-влак дене вашлийыныт. «Ончыко» журналын тӱҥ редакторжо И.Попов, художественный редакторжо Б.Шамиев да ответственный секретарьже Е.Тетерина журналын историйже да тачысе илышыже, книга издательствын пашаже, да тачысе марий сылнымут нерген каласкаленыт. Театральный отделенийын кумшо курсыштыжо тунемше И.Юдин (курыкмарла) ден С.Ведерникова (олыкмарла) уна-влаклан И.Поповын почеламутшым лудыныт. Эше ик студент Д.Смоленцев шке возымо почеламутшо дене сайын ӧрыктарен.
Колледжыште марий йылмым туныктышо Светлана Ивановна Смолиналан вашлиймашым эртараш полшымыжлан кугу таум ойлена.
