Минск олаште белорусла лектын шогышо «Нёман» сылнымутан журналын визымше номерыштыже Марий Эл гыч поэт-влакын сылнымут саскашт савыкталтын. Тидыжым белорус да марий сылнымут коклаште улмо вашкылын эше ик чапле лостыкшо семын аклаш лиеш.
Белорус лудшо-влак Сергей Чавайнын, Валентин Колумбын, Семён Николаевын, Альберт Степановын, Гани Гадиатовын, Вячеслав Абукаев-Эмгакын, Геннадий Оярын, Альберт Васильевын, Зоя Дудинан, Валентина Изилянован, Светлана Григорьеван, Игорь Поповын, Надежда Эмыканын, Татьяна Соловьеван почеламутышт дене палыме лийыныт. Мӱндыр марий кундем гыч латныл мутмастар, тӱрлӧ пагытысе поэт-влак, классикмыт ден кызытсе возышо-влак... Тыгай савыктыш белорус ден марий сылнымут кылым умбакыже пеҥгыдемдымаште – шке шотан серыпле негыз.
Каласаш кӱлеш, кызытсе пагытыште тиде кылым чоткыдемдаш марий писатель, савыктыш пашаеҥ Юрий Соловьев чулымын тырша. Белорус сылнымутчо-влак дене тудо пеҥгыде кылым куча.