Марий Эл Республикын районлаштыже туныктышо-влакын августысо конференцийышт эртен. Тунемше ончыкылык тукымым шуарен куштымаште чулымын тыршыше пашаеҥ-влак эртыше ий мучко могай паша саска дене куандарымышт нерген каласкалат, ончыкыжым мом ышташ шонымышт дене палдарат. Ты кӱлешан вашлиймашке книгам савыктыме, журналлам лукмо дене палдарыме шот дене «Марий книга издательстве» савыктыш пӧрт кугыжаныш унитарный казна предприятийын коллектившат миен.

Тенийысе конференций-влак «Национальные проекты: новые возможности для муниципальной системы образования» теме дене эртеныт. Тыгай форум-влак Морко, Шернур, Кужеҥер районлаштат кугу нӧлталтмаш кумылым луктыныт. Лач нине кундемлаште лийыныт мемнан пашаеҥна-влак: издательстве директоржо Ю.И.Соловьев, «Ончыко» журналын тӱҥ редакторжо И.Г.Попов, журналын ответственный секретарьже Е.И.Тетерина да редактор Б.А.Шамиев. Нуно туныктышо-влак дене вашлийыныт, туныктыш пашаште лекше нелылык да ситыдымаш-влак нерген пален налыныт, нуным кораҥдыме корнылам рашемдаш полшеныт, шочмо йылмым туныктымаште улшо экшык-влак нерген шӱм вургыж ойленыт. Погынышо-влак «Марий книга издательстве» савыктыш пӧртын лукмо книгам, журнал-влакым, моло сатум кумылын налыныт.

Тыгай вашлиймаш марий савыктышым вияҥдаш лудшо-влакым шочмо сылнымут деке утларак кумылаҥдаш полшышаш.