27 сентябрьыште Советский районысо Кужмарий лудмыгудышто краевед, журналист, писатель, «У сем» журналын ончычсо тӱҥ редакторжо М.И. Кудряшов лӱмеш «Курык сер гыч мурызо» шарнымаш шагат эртен. Мероприятийыш тудын пелашыжым Любовь Михайловнам ӱжмӧ ыле. Тудо Советский районысо Кугу Шӱргыйымал ялеш шочын. А М.И. Кудряшов нерген лудмыгудышто «Кӱкшыт гыч ончышо писатель» лӱман ончерым ямдылыме.

Михаил Иванович Кудряшов 1986 гыч 1989 ий марте Кужмарий кыдалаш школышто историйым туныктышылан пашам ыштен. Ялысе калык Михаил Ивановичым чулым, поро, эре полшаш ямде улшо еҥ семын шарна. Пырля пашам ыштыше О.И. Козырева ден И.А. Михеева тудын туныктымо жапыште лийше оҥай илыш сӱрет-влакым шарналтышт. Тунемше В. Ефремова ял еда вер-шӧр арвер-влакым поген коштмо нерген каласкалыш. Пелашыже Любовь Михайловна Кудряшовмыт ешын илышыже, Михаил Ивановичын усталык пашаж гыч ушеш да шӱмеш кодшо оҥай факт-влакым шарналтыш.

М.И. Кудряшовым писатель семын «Шем шыҥалык йымалне», «Время жить» книгалаж гоч шарнат. Книгалашке пуртымо кажне ойлымашат кызытсе илышын пӱсӧ йыжыҥлажым тарватат, лудшо-влакым шкешт дек савырат да илыш нерген келгын шонкалаш таратат.

Мучашлан Любовь Михайловна Кужмарий лудмыгудын пашаеҥже-влаклан кугу таум каласыш да тудын фондшылан М.И. Кудряшовын книгаже-влакым пӧлеклыш.