…Да курымешлан тушан верланен. Чапкӱ сын дене.
Ме кызыт кумдан палыме марий поэт Михаил Иванович Якимов (1929–1996) да тудын лӱмеш 3 октябрьыште Параньга районысо Яҥгетсола ял покшелне почмо шарнымаш обелиск нерген шомакнам ярымлена.
Тыгай шарнымаш кӱм почмо нерген шонымашым тений идалык тӱҥалтыште С.Г.Чавайн лӱмеш Национальный книгагудышто М.Якимовлан 90 ий темме пайрем кечым палемдыме годым туныктышо-ветеран, Параньга районысо Матародо кыдалаш школышто ятыр ий тыршыше Э.В.Захарова калык ончылно луктын каласен ыле. Тудо ты пашалан кумылан еҥ-влак деч оксам погаш мер фондым почаш, чумырымо шийвундо дене Параньга районын данле шочшыжо, чапле марий поэт М.И.Якимовлан чапкӱм заказатлаш да шогалташ ӱжын ыле. Вет поэтын тӱвыргӧ поэзий саскаже марий сылнымут садвечыште курым-курымешлан кодын да марий лудшым эреак сымыстараш тӱҥалеш.
Ӱжмаш южыш каен огыл, калык тудым колын. Да теве кандаш тылзе гыч Яҥгетсола ял покшелне мотор шарныктыш вер почылтын. Чатката изи пече коклаште гранит кӱ оҥаш поэтын портретшым сӱретлыме, йымалныже шочмо ялжылан пӧлеклыме почеламутшо гыч ныл корным серыме…
Ты кечын Яҥгетсолашке пеш шуко уна погынен ыле. Толыныт Йошкар-Ола, Параньга гыч, воктенсе ялла гыч еҥ-влак чумыргеныт, марий мутмастарын родо-тукымжат тыште лийын. Да йоча-влак шукын ыльыч. Вет поэтын серен кодымо сылне произведенийже-влак нуныланат пӧлеклалтын. Саламлыме мутым, землякыштым кугешнен шарнымылан тауштымо шомакым, поэт нерген шарнымашым Марий Эл Республикысе тӱвыра, печать да калык-влак кокласе паша шотышто министрын алмаштышыже Г.С.Ширяева, Россий писатель ушемын Марий региональный пӧлкажым вуйлатыше С.Д.Архипова, литератор да журналист-влак Ю.И.Соловьев, Г.Ф.Гордеев, Б.А.Шамиев, Г.Л.Сабанцев, И.Г.Попов, Параньга муниципал район администраций гыч вуйлатыше пашаеҥ-влак ойлышт. Мут толмашеш каласен кодена: районысо депутат-влак Погынын председательже, Мер Каҥашын районысо пӧлкажым вуйлатыше Л.Л.Михееват чапкӱм почмашке кугу надырым пыштен, организационный пашам виктарыме годым районысо администраций могырым полыш кидым пуэн.
Поэтын землякше, пошкудыжо да родыжо-влакат шке шокшо кумылыштым почыч. Верысе тӱвыра пӧртын самодеятельный артистышт М.Якимовын почеламутшылан палыме марий композитор-влакын возымо сылне муро-влакым шергылтарышт, йоча-влак почеламутым йоҥгалтарышт. А пытартышлан пайремыш погынышо-влак Михаил Якимовын почеламутшылан серыме, калыкыште кумдан шарлыше да йӧратыме «Кайыккомбын толмыжым…» мурым чылан пырля муралтышт.
С.Архипова ден И.Речкинын фотожо