Вургыжшо шӱман айдеме эре могай-гынат сомылым муэш. Тыгай-влак радамышке Советский районысо Михайловка кундемыште илыше Георгий Иванович Мичеевым кокытеланыде пурташ лиеш. Икмыняр ий ончыч, пенсийыш лекмекыже, тудо йӧратыме Оваснур кундемжын историйжым, тусо калыкын геройло илышыжым шымлыме пашалан пижын да краевед семын икмыняр книгам марла савыктен. Тений нунын незызеш у книгам рушла лукташ йӧным муо. «Абаснур. Легенды и были лесного края» книгаж дене палдараш манын кызыт пытыше ты вершӧрыш шуко унам – шкешотан артистым, вургыжшо шӱман мер пашаеҥым, журналист-влакым ӱжын.
Писын йогышо Изи Кундыш эҥерын тура серыштыже ты ялын палыже гына кодын. Краевед Г.И.Мичеевын кычалмыж почеш легендыш пурышо ты кундемлан негызым Кундыш кугыза пыштен, вийым пуэн, калыкым порылыклан кумылаҥден. Георгий Ивановичын кычалмыже арам лийын огыл: тыште Кундыш курык кугызалан палыме марий художник С.И.Таныгин чапле сӱретым ыштен, тудым курык воктенак вераҥдыме, историйыш пӧртылтышӧ фотосӱрет-влакымат кучылтмо.Онапулан шоҥго пистым ойырен налме, виян памашым кычал муын, эрыктен сӧрастарыме. Курыкын тура серыштыже Кундыш кугызам тойымо верлан шотлен, кӱм шогалташ тӱҥалме. Онапу ончылно, памаш ӱмбалне, Кундыш кугызам тойымо верлан шотлымо курык серыште кум онаеҥ – Ефим Михайлович ден Григорий Михалович Виногорвмыт да Петр Павлович Герасимов кумалме йӱлам шуктен пелештат. Михайловка да Кельмаксола тӱвыра пӧрт-влакын шкешотан артистышт ожнысо муро-влакым йоҥгалтарат. Кужмара ялшотан илем администраций вуйлатыше И.А.Янцев, Михайловка тӱвыра пӧртын пашаеҥже-влак, ватыж ден марийже, Н.С. ден В.В.Анисимовмыт, уста гармончо Л.С.Ермаков усталыкышт дене поснак куандареныт. Георгий Ивановичын тукым шӱжарже-влак Галина ден Валентина тошто мурым сылнын йоҥгалтареныт. Вес краевед Леонид Киртаеват шке лукмо икмыняр книгаж ден палдарен.
Ты мотор вершӧрым ончен коштмо деч вара гына у книгалан презентаций тӧҥале. Книгам лукмо неле, но суапле паша нерген «Марий книга издательстве» савыктыш пӧртын директоржо Ю.И.Соловьев радамын каласкален. Шуко еҥ тауштымо поро шомакым ойлен. Шкешотан артист-влакын сылне мурсемышт дене книга презентаций пытен.
Иван Речкинын фотожо.