Звенигово районысо Красногорский посёлкын шочмыжын вес ийжынак – 1929 ийыште – книгагудым ышташ шонымаш ылыжын. Тунамсе кучем орган-влак тыгай кумыл лекмым умылен вашлийыныт да у верыш илаш погынышо пашаеҥ-влакын канышыштым пайдалын эртараш келшыше верым муыныт. Тыге калыкым книгалан шӱмаҥдыме поро паша тӱҥалын. Ий-влак эртеныт, вуйлатыше-шамычат вашталтыныт, но тӱҥжӧ – книга фонд ешаралтын. Лудаш кумылан-влакым шке йырже чумырен моштышо коллектив книгагудын чапшым эре нӧлтен толын.

Ынде лӱмлӧ книгагудым ты районыштак шочын-кушшо чолга марий ӱдырамаш Алевтина Александровна Семёнова моштен вуйлата. Ныл еҥ тыршыман ты тӱвыра учреждений посёлкышто илыше тӱрлӧ ийготан еҥ-влакым каныме, шӱм-чоныштым луштарыме верышкышт савырнен. Тидыже книгагудын 90 ияш юбилейже лӱмеш эртарыме пайрем касыште поснак шижалте. Вет ты кугу лӱмгече дене саламлаш Марий Эл Республикын тӱвыра, печать да калык-влакын пашашт шотышто министрын алмаштышыже Галина Ширяева, Звенигово муниципал районысо депутат-влак погынымашын председательже Наталья Лагутина, муниципал район администраций вуйлатышын алмаштышыже Ольга Михайлова, район администрацийын тӱвыра да спорт паша пӧлкажым вуйлатыше Алевтина Коптелова толыныт. Шуко-шуко пӧлекым, таушымо шомакан серышым, чап кагазым конденыт. Тўвыра пашаеҥ-влак профсоюз рескомын районысо пӧлкаже лӱм дене Светлана Гаврилова шерге пӧлек дене пырля чапле марий мурым йоҥгалтарен. Тиде сылне мурсем да моло концерт номер погынышо-влакын кумылыштым чотак нӧлталын.

Кугу пайремыш савырныше лӱмгече касым вӱдышӧ, районысо книгагудо системын директоржо Ирина Прибылован марий рӱдола гыч ӱжмӧ эн шерге уна-влак кокла гыч иктыжлан – «Марий книга издательстве» савыктын пӧртын директоржо, марий писатель Юрий Соловьёвлан - мутым пуымыжым чылан совым кырен вашлийыныт. Вет тудо книгагудыш пеленже ятыр марла савыктышым конден. Юрий Ильич, пӧлекым кучыктышыжла, книгагудо дене вашкылым пеҥгыдемдаш сӧра да толшо чыла еҥым савыктыш пӧртыш декабрь мучко писатель-влак дене вашлиймашыш, книгам, журналым, моло савыктыш сатум шулдырак ак дене ужалымашке мияш ӱжын. Куан уверым пайрем калык уло кумылын вашлийын.

Лудшо-влак пелен да лудшо-влаклан 90 ийым пєлеклыше книгагудын лӱмгече пайремже кугу концерт дене мучашталтын.

   

  

   

   

    

  

  

  

И.Речкинын фотожо.