Марла лекше газет ден журнал, теле- да радио редакций-влаклан ончыкылык пашаеҥ-шамычым ямдылыме йодыш эре пӱсӧ лийын. Нунылан уста журналист-влакым ситарыме шотышто посна программе семын «Ямде лий» йоча газет редакций самырык корреспондент-влакын школыштым почын ыле. Тудо кажне ийын слетым эртарен, возкалыме пашалан кумылан эн уста рвезе ден ӱдыр-влаклан журналистике аланыш корным почын. Тыгаяк шонымаш дене пашам ышта икмыняр моло редакций коллективат.

У Торъял район администрацийын образований пӧлкажын пашаеҥже-влакат самырык-влакым усталык пашалан кумылаҥдымаште шке надырыштым ужаш шонен пыштеныт. Марий кумылан методист-влак школлаште шочмо йылмым туныктышо-влак, южо вере ыштыше юнкор кружок-влакын вуйлатышышт дене кутырен, ик шонымашыш шуыныт: самырык корреспондент-влакым ямдылыме шотышто республик кӱкшытан площадкым ышташ. Тушко «Марий книга издательстве» савыктыш пӧртын шулдыржо йымалне пашам ыштыше марла журнал-влакын да «Ямде лий» йоча газетын редакцийыштын журналистыштым, писатель да поэт-влакым ушнаш ӱжын. Кугу вашлиймашым Марий Эл Республиклан 100 ий да Кугу Сеҥымашын 75 ийже теммылан пӧлеклаш лийын.

Площадкын икымше паша вержылан Токтарсола тӱҥ школым ойырен налыныт. Игече начарлан кӧра республик кӱкшытан вашлиймашыш Марий Турек да Шернур районласе юнкор-влак да У Торъял районысо ныл школысо самырык корреспондент-влак шке пашашт дене палдараш, лӱмлӧ журналист, писатель-влак дене шинчаваш мутланаш, шинчымашым пойдараш, возымо мастарлыклан тунемаш толыныт. ӱжмӧ уна-влак коклаште «Ончыко» журналын тӱҥ редакторжо поэт Игорь Попов, «Ямде лий» йоча газетын ответственный секретарьже, Марий Эл Республикын заслуженный журналистше Людмила Григорьева, «Ончыко» журналын редакторжо, республикын заслуженный журналистше Борис Шамиев лийыныт.

Площадкын пашажым тӱҥалме дене саламлаш У Торъял район депутат-влак погынымашын председательже, ты школын ончычсо директоржо Евгений Небогатиков толын. Тудын порын тыланыме шомакше шочмо йылмым арален кодаш ¢жмашке виктаралтын ыле. Тыгаяк мутым ойленыт школ директор Галина Садовина, район администрацийын образований пӧлкажын вӱдышӧ специалистше Лиана Смирнова, Токтарсола школышто марий йылмым да литературым туныктышо Татьяна Смородинова. Уна-влакат шке коллективышт дене палдареныт, кугурак савыктышла дене таҥлалташ темленыт да секций-влакын пашашкышт ӱжыныт.

Площадкын икымше вашлиймашыже куандарышын эртыш: поэзий, прозо да публицистике секцийлашке ончыкылык корреспондент, писатель-влак кумылын толыныт, опытан кугыеҥ-влакат эртарыме мастер-классыште усталыкыштым тергеныт, журналистикын сай могыржо ден нелылыкшым пален налыныт. Шке паша саскаштым – тӱрлӧ йӧн дене лукмо газетыштым ончыктеныт. Эн сай да келге содержаниян газет-влак коклаште Шернур район Марисола, Марий Турек район Сардаял, У Торъял район Токтарсола, Кузнеч, Элембай да У Торъял посёлкысо школ-влакын газетыштым шотлымо да диплом, книга-влак дене кумылаҥдыме.

У ий пайрем лишеммым шотыш налын, Йӱштӧ Кугыза ден Лумӱҥдырат слётыш толаш вашкеныт, погынышо чыла еҥлан чапле пӧлекым кучыктеныт, воктенышт шогалын кушталташ ӱжыныт.

Идалык мучаште, 24 декабрьыште эртыше юнкор-влакын республик кӱкшытан площадкыштын икымше слётшо шке ончылныжо шогышо тӱҥ задаче-влакым тӱрыснек шуктен. Массовый информаций средствылаште шочмо йылме дене возаш кумылан рвезе ден ӱдыр-влакын радамышт ок изем, марла лекше савыктыш-влак келге шинчымашан пашаеҥ-влаклан чӱдылыкым шижаш огыт тӱҥал манме шонымаш пеҥгыдемын.
Б.РЕДЬКИН.