Морко кундемын эше ик эргыже – поэт да музыкант Юрий Чавайнын шочмыжлан 90 ий теме. Тиде чапле лӱмгече тудын ачаже, марий сылнымутланна негызым пыштыше Сергей Григорьевич Чавайнын шочмо ялыштыже, Чавайнурышто почмо сылнымут да этнографий комплексыште эртен. 

Вашлиймашым «Морко мланде» район газетын тӱҥ редакторжо, Мер Каҥаш член да Кокласола ял шотан илемын депутатше Анатолий Анатольевич Титов почын. Поэтын илыш да усталык корныж дене комплекс вуйлатыше Олег Владимирович Петров палдарен, погынышо-влакым тоштер мучко кондыштарен.ӱҥ

Вараже пайрем ӱстел коклашке куснен. Вет музейын пашаеҥже-влак: Людмила Александровна Петрова, Алефтина Владимировна Ямблатова, Алевтина Ивановна Титова да Лидия Васильевна Ильина шкештак коҥгаште мелнам кӱэштыныт, чайым йӱктеныт, да гармоньым кидыш налын, поэтын йӧратыме муро-влакым шуйдареныт. ӱдырамаш-влакын палемдымышт почеш, сылнымут да сылнысем мастар Юрий Чавайн «Кунам ломбо пеледеш» мурым поснак йӧратен. Шарнымаш касыш толшо уна-влак: «Марий книга издательстве» савыктыш пӧртын директоржо, прозаик Юрий Соловьев, «Ончыко» журналын редакторжо Борис Шамиев да «Марий Эл» газетын пашаеҥже, поэт Юрий Исаков юбилярым шарнен ойленыт, тачысе сылнымутын кузерак вияҥмыж нерген каласкаленыт.

Вара вашлиймаш умбакыже Арын школыш куснен. Чумыр коллектив юбилейлан чот тыршен ямдылалтын. Погынышо калык тунемше-влакын сылнысем да сылнымут усталыкыштым шулен ончен да колыштын. Тыштат шуко шарнымаш йоҥген. Ю.И.Соловьев «Марий книга издательстве» савыктыш пӧртын шукерте огыл лукмо книгаже-влакым пӧлеклен. Уна-влак школын поян музейыштыже лиыйныт, шарнымаш книгаш шонымашыштым возен коденыт.

Ю.Косатан
Б.Редькин