1 февральыште «Марий книга издательстве» савыктыш пӧртыштӧ Башкортостан Республик гыч марий родына-влак уна лийыч. Тиде – Мишкан районысо Пӧкленде ял гыч «Ленде» фольклор ансамбльыш коштшо-влак. Каныш кече вашеш нуно лӱмынак жапым учырен, Марий Элым ончалаш толыныт. Южыжо Йошкар-Олаште икымше гана лийын.

Тӱрлӧ вере ончен коштмек, М.Шкетан лӱмеш Марий национальный драме театрыште спектакльым ончымек, эрвел гыч марий-влак «Марий книга издательстве» савыктыш пӧртышкат пурышт, организацийын пашаж дене келгын палыме лийыч. Тидын нерген директор Ю.И.Соловьев кумдан каласкалыш. Поэт Геннадий Оярынат ойлымыжым да почеламутшо-влакым лудмыжым колышташ нунылан келшен. Чеверласыме годым уна-влак яра кида ышт кай, книга ден журнал-влакым пӧлек шотеш кучышт, шке оксашт денат ятыр книгам нальыч. Вашлиймаш пеш пайдалын эртыш.