Валерий Николаевич Бердинский 1950 ий 5 майыште Марий АССР Шернур район Тумерсола ялыште шочын. Коклала кандаш ияш, Шернур кыдалаш школлаште тунемын, умбакыже Чебоксарысе кооперативный техникумышто шинчымашым поген. Шернур райпошто кум ий товароведлан ыштымеке, армийыш каен. Армий деч вара Куйбышев (кызыт — Самара) оласе планово-экономический институтышто тунемын. ™Ӱмыржӧ мучко Шернур райпошто пашам ышта, 1994 ий гыч тудым вуйлата.

Пашам йӧршеш вес аланыште ышта гынат, писатель семын Валерий Бердинский шукертак палыме. «Шере мӱйын кочыжо» икымше ойлымашыже 1969 ийыште Шернур районысо «Призыв» газетыште савыкталтын. Умбакыже ойлымашыже-влакым «Марий Эл», «Кугарня» газетлаште, «Ончыко» журналыште чӱчкыдын лудаш лийын. 1987 ийыште «Мардеж шӱшка» икымше ойлымаш сборникше лектын. Тачысе кечылан Валерий Николаевич — шуко книган авторжо. Пытартышыжым — «Все мы люди» — рушла 2018 ийыште «Марий книга издательстве» савыктыш пӧрт луктын. Произведенийже-влак тыгак казах (М.Сыздыкова, 1989) да венгр (Н.Каталин, 2006) йылмылаш кусаралтыныт.

Валерий Бердинскийын ойлымашыже-влак кажне лудшын чонжым тарватат. Мотор, чатка, тыгодымак проста йылме дене воза. Лудмо годым шукертсек палыме айдемын каласкалымыжым колыштмо гай чучеш. Санденак возымо кажне предложенийжылан ӱшанет. Сюжетшат ик могырым тыглай гына улыт, но геройжым туге сайын почын пуа — лудмак шуэш!

Марий сылнымутлан писатель шке произведенийже дене гына огыл полшен шога. Марий книга-влакым, «Ончыко» журналнам лудшо-влак коклаште шарымаштат Валерий Николаевичын надырже кугу.
Пагалыме писательлан пеҥгыде тазалыкым, ешыштыше келшымашым, пашаштыже сай лектышым, сылнымутышто у чапле произведений-влакым тыланена!
А лудшо-влак В.Бердинскийын ик ойлымашыжым "Ончыко" журналын лишыл номерыштыже лудын кертыт.