Марий книга савыктышын 95 ияш да «У сем» курыкмарий йылме дене лекше сылнымутан да мер-политик журналын 90 ияш лӱмгече-влак пайрем С.Г. Чавайн лӱмеш Национальный библиотекыште эртаралтын. Пайремым Марий книга савыктышын директоржо Юрий Ильич Соловьев почын. Саламлымаш мутым Марий Эл Республикысе тўвыра, печать да калык-влак паша шотышто министрын алмаштышыже Михаил Иванович Матвеев ойлен, волгыдо ончыкылыкым да пашаште сеҥымашым тыланен. Тыгак тудо министр Константин Анатольевич Ивановын саламлымашыжым лудын пуэн, редактор Надежда Виссарионовна Лихачевалан «Служение народу» чап медальым, секретарь-референт Людмила Аркадьевна Иманаевалан, бухгалтер-влак: Валентина Валерьевна Россыгиналан, Любовь Геннадьевна Маловалан министрствын благодарностьшым кучыктен.

Поро мутым издательствын ондаксе директорышт Альбертина Петровна Аптуллина ден Георгий Прохорович Пирогов ойленыт. Издательстве нерген чапле докладым Алексей Максимович Кленов ыштен. Прозаик, Россий писатель ушемын йыжыҥъеҥже Анатолий Сергеевич Ишалин, Национальной библиотекын директоржо Ирина Витальевна Щеглова саламлымашке ушненыт.
«У сем» журналын тӱҥ редакторжо Людмила Петровна Ягодарова журнал нерген докладым ыштен.

   

 

  

Фотом С.Архипова ыштен.