Сылнымут да журналист корным ойырен налше самырык автор-влаклан, 2019-2020 ийласе паша-влакым негызлен, «Ший памаш» фондын Марий Эл Республикын калык писательже Вячеслав Абукаев-Эмгак лӱмеш премий-влакым кучыктымо. Жюри конкурсыш пурышо чыла пашам ончен да сеҥыше-влакым палемден.

«Поэзий» номинацийыште Раисия Сунгурова ойыртемалтын. Поэтесса «Кинде-шинчал» премий дене палемдалтын.

Прозо» номинацийыште Анжела Тимоева лектын. Тудлан «Ошкеча» премийым кучыктымо.

Эн сай журналист пашалан «Марий Эл» газетын пашаеҥже Ольга Мошкина ден «Кугарня» газетын пашаеҥже Надежда Моисеева «Виш чон» премийым налыныт.

Эн сай теле да радио-журналист паша номинацийыште «Ший памаш» фондын дипломжо да «Канде толкын» премий дене ВГТРК-н «Марий Эл» ГТРК филиалжын тележурналистшым Людмила Федоровам да «МЭТР» каналын тележурналистше Вера Гороховам палемдыме.

Сеҥыше-влаклан тыгак Вячеслав Абукаев лӱмеш шарнымашан медальым кучыктымо.

Жюри член, Россий писатель ушемын йыжыҥъеҥже, Юрий Соловьев сеҥыше-влакым шокшын саламлен да пашаштышт кугу кӱкшытым тыланен.

   

 

Э.Петровын фотожо