С. Архипова
«Сылнымут алмаштыш» Регион кокласе самырык-влакын сылнымут семинар да конкурс Пошкырт кундемысе Мишкан селаште эртаралте. Тиде семинар марий сылнымутын классикше Яныш Ялкайнын шочмыжлан 115 ий темме лӱмеш да марий писатель Мария Аюпован шочмыжлан 125 ий темме лӱмеш пӧлеклалтын. Ты гана Мишкан селашке марий йылмым тунемше самырык автор-влак, нунын пелен туныктышо, ача-ава-влак погыненыт. Талантан ӱдыр-рвезе-влак ынде вич ий почела да ты гана кок ий гыч эртарыме семинарыш эреак кумылын толыт.
Поро саламлымашым Мишкан администрацийым вуйлатыше Павел Владимирович Трапезников каласен. Мишкан селаште марий исторический тӱвыра рӱдерым вуйлатыше Алексей Васильевич Ибулаев, марий йылмым туныктымо шотышто Мишкан районысо образований пӧлкан специалистше Алена Семеновна Килинбаева, Мишкан районысо марий йылмым туныктышо-влак ушемым вуйлатыше Надежда Геннадьевна Салиева, «Келшымаш» район газетын редакторжо, уста поэт Эсен Элай, Россий писатель ушем йыжыҥъеҥ, йоча прозаик Елена Юнусова аклыме пашам вораҥдареныт. Тыгак кугу полышым да чапле ой-каҥашым, поэтессе да туныктышо Анжелика Леонидовна Юзукбаева, район книгагудын тӱҥ библиотекарьже Олеся Михайловна Зайнитдинова, район книгагудын тӱҥ библиографше Ильвира Харисовна Айбердина пуэныт.
Пошкырт кундемыште талантан тунемше-влак ятырын улыт, нуным жапыштыже ужын шуктен, мастарлыкыштым вияҥден колташ полшымо задаче Марий Эл Республикысе Россий Писатель ушемын региональный пӧлкажын ден Марий Эл Республикысе тӱвыра, печать да калык-влакын пашашт шотышто министерствын моло сомыл-влак коклаште кӱлешанлан шотлалтеш. Министр Константин Анатольевич Иванов да министрын алмаштышыже Галина Степановна Ширяева Пошкырт кундемыш миен коштмо проектым илышыш вораҥдараш манын, кугу тыршымашым ончыктеныт. Тыгак Марий книга савыктышын вуйлатышыже Юрий Ильич Соловьев школ-влаклан ондак савыкталтше, но таче кечынат кҥлешан учебник-шамычым пӧлеклен. Тиде пайремым эртарен колтымаште прозаик, Россий писатель ушемын йыжыҥъеҥже, Марий тӱвырам да сымыктышым вияҥдыше «Ший памаш» поро кумыл фондын вуйлатышыже Василий Владимирович Красновынат надырже уло.
Тиде пашан лектышыже коеш, вет Пошкырт кундем гыч студент-влак марий кундемысе вузлаште тунемыт, ты ганат ме талантан ҥдыр-рвезе-влак дене вашлийын, каҥашым пуэн, Марий Эл Республикыш шинчымашым погаш толаш мутланыме.
Марий Элысе писатель ушем Пошкырт кундемыш шуко ий почела миен коштеш, ондак тушто «Сылнымут шошо» лӱман семинарым эртарыме гын, кызыт пашам ятырлан кугемдыме, мутланымашнам идалык мучко интернет полшымо денат вораҥдарыме.
Сылнымут конкурсышто сеҥыше-влаклан книга пӧлекым ыштыме, да диплом-влакым пуэдыме. А туныктышо-влакым чапкагаз дене палемдыме. Самырык автор-влакын возымыштым эреак «Эрвий» альманахыште савыктен шогена. Тыгак «Кече/Солнышко» журналыште чӱчкыдынак чапле материал-влак савыкталтыт. «Ямде лий», «Кугарня» газет-влак, «Ончыко», «У сем» журнал йоча-влакын произведенийыштым уло кумылын савыктат.
Пошкырт кундемысе самырык автор-влак дене паша ышталтын да ончыкыжымат вораҥдаралташ тӱҥалеш.
