Москосо Йошкар площадьыште июнь рӱдын шымше гана «Йошкар площадь» книга фестиваль эртен. Тушто Российысе 300 утла издательстве шке книга сатужым калыклан ончыктен, тӱрлӧ книгам лудшыеҥлан да уна-влаклан Марий книга савыктышат темлен. Тиде фестиваль эртарыме жапым тӱрлӧ амаллан кӧра 3-6 июнь гыч 17-20 июньыш кусарыме. Тыге Российын президентше В.В. Путин фестивальым эртарен кертме нерген порученийым подписатлен.

Калыклан книгам ямдылыше-влак чакнен огытыл. Тидын нергенак «Российын регионжо-влак» шатер-шамыч ончыктеныт. Книга фестивальыш чылаже 45 регион ушнен. Площадкын кураторжо Константин Чеченевын ойлымыж почеш, мероприятий жапым вашталтымылан кӧра 11 издательстве толын кертын огыл. Толшышт лудшо-влаклан эн чапле книга сатуштым темленыт.

Марий Эл Республик гыч мийыше Марий книга издательстве пелен ик площадкыште Йӱдвел Осетий, Чечня, Дагестан, Башкортостан, Удмурт, Саха (Якутий) республике-влакын савыктышышт-влак верланеныт. Лудшыеҥ ден уна-влакым Марий книга савыктышын директоржо Юрий Соловьев ден Марий писатель ушемым вуйлатыше Светлана Архипова вашлийыныт.

Мепроприятий-влак кышкарыште Марий книга савыктышын ямдылыме «Марий калыкын военный историйже» книга презентацийым эртарыме. Тиде книгам А.Г. Бахтин ден А.В. Соколов ямдыленыт. Калык ончылно Марий кугыжаныш университетын профессоржо Александр Бахтин марий калыкын да Российын военный историйже нерген каласкален.

Тиде жапыштак Йошкар площадьыште Национальный сылнымут фестиваль гӱжлен. Тудын программыштыже лекций, дискуссий, творческий вашлиймаш, йылме мастер-класс, концерт да йоча мероприятий-влак лийыныт. «Россий калыкын кызытсе сылнымутшо. Поэзий» антологий дене палдареныт. Тушко 229 автор-влакын сылнымутышт коклаште Марий Эл гыч Анатолий Тимиркаевын, Валентина Изилянован, Геннадий Сабанцевын, Татьяна Соловьеван, Игорь Поповын почеламутышт савыкталтыныт. Тӱрлӧ кундем гыч толшо лӱмлӧ поэт-влак шке произведенийыштым сценыште лудыныт.

«Национальный йылме дене книга да билингва» темылан дискуссийыште Юрий Соловьев ден Светлана Архипова крымскотатар писатель-влак Гульнара Ильясова ден Зенифе Аблаева дене пырля мутланеныт. Тудым Россий Науко Академийысе тыгыде калыкым арален кодымо да шымлыме лабораторийын шанчызыже, лингвист Карина Шейфер вӱден.

Тиде книга фестивальым Россий Федерацийын цифровой вияҥмаш, кыл да массовый коммуникаций министерстве ден Россий книга ушем вуйлатеныт. Пайрем офлайн да онлайн йєн дене эртен. Лудшыеҥ ден уна-влак келшыше книгам налын кертыныт, тыгак йӧратыме писательышт дене мутланеныт, йодышым пуэденыт, актер-ден музыкант-влакын выступленийыштым онченыт.
Ешартыш:

https://www.marpravda.ru/news/zhiteyskie-istorii-literatura/knigi-iz-mariy-el-ukrasili-krasnuyu-ploshchad/