Тений 17 июльышто Морко районысо Кӱчыкэҥер ял деч тораште огыл улшо шӱгарлаште палыме марий поэт Аркадий Иванович Букетовым шарныме лӱмеш гранит плитам шогалтыме. Верысе калык тиде шӱгарлам Сӱрем Ото манеш. А.И. Буктовым шарныктыше кӱ тылеч ончычат тыште лийын, но лишыл родо-тукымжо тыге шонен пыштен: мрамор олмеш гранит кӱ лийшаш, тушко поэтын почеламут корнылажым возыман.
Эше ӱмаште шыжымак нуно у чапкӱм ямдылыме шотышто вораҥдарыме сомылым тӱналыныт. Теве кызыт, 17 июльышто, шонымаш тӱрыснек шукталтын. Поэтын ӱдыржын, Галина Аркадьевнан, ешыже – эргыже-влак да пелашыже – тидлан шке вийыштым пуэныт, шарныктыш гранит кӱм ачашт ден аваштын шӱгарышт коклаш вераҥденыт. 18 июньышто ты шӱгарлаштак нунын эше ик лишыл родыштым тойымо, да тыге лектын: поэт Аркадий Букетов дене лишыл родо кыл гоч ушалтше-влак у шарныктыш кӱм ужын кертыныт. Икманаш, тыге вучыдымын, ончылгоч палемдыде, чапкӱ дене палдарымаш лийын. Поэтын родо-тукымжо тудым сайлан шотлен. Чапым сулышо еҥлан – чапле шарныктыш кӱ. Шарнымаш ятыр-ятыр ончыкылан кодеш. Поэтын йочашт огыт лий, а мутмастарым шарнымаш книгалаште веле огыл, а тиде гранит плиташтат волгалташ тӱҥалеш. А тушто «Ӧтӧгӧн» поэме гыч тыгай ныл корным вераҥдыме:
Ош тӱняшке ме чылан
Унала вел толына.
Порылыклан курымлан
Тукым мурым кодена.
Пеш келге шонымашым тарватыше корно-влак улыт.