Б. Алексеев
Жап шуде илыш гыч кайыше, но марий сылнымут аланыште пале кышам кодышо мутмастар-влакын возымо пашаштым «Марий книга издательстве» савыктыш пӧрт лудшо-влак деке шукташ корным эре кычалеш. Пытартыш ийлаште гына тыгай поэт, писатель-влакын возымыштым посна книга дене лукмо. Тыге марий лудшо-влак шочмо сылнымутым пойдарен кертшаш еҥ-шамычын творчествышт дене палыме лийыч. Ик тыгай пытартыш книга Шернур вел марий Иван Бердинскийын почеламут сборникше ыле.
Поэтын творчествыже да у книгаж дене палдарыме вашлиймаш Ким Васин лӱмеш Шернур район рӱдӧ библиотекыште эртыш. Тушко шуко уна да сылнымутлан кумылан еҥ погыненыт. Вашлиймашым эртараш книгагудо директор И.Г. Кошкина, краеведений пӧлка вуйлатыше Е.Л. Яшкина чот тыршен ямдылалтыныт.
Ӱжмӧ уна-влак кокла гыч эн вучымо, эн шергыже, мутат уке, поэтын шӱжарже Г.А. Смирнова лийын. Вашлиймашым почшыла мутым эн ончыч тудлан пуышт. Галина Анисимовна изажын неле илышыжым шинчавӱд йӧре шарналтыш. Вара поэтын тукым шольыжо, Шернур райпо правлений председатель, Россий писатель ушем член В.Н. Бердинский ойла, але марте палыдыме тат-влак дене изажын илыш корныжым пойдара. «Марий книга издательстве» савыктыш пӧртын директоржо, Россий писатель ушем член Ю.И. Соловьев книга лукмо неле паша кузе эртыме нерген каласкала. Шернур районыштак илыше Россий писатель ушем член-влак З.В. Ермакова да А.И. Мокеев поэт дене вашлиймашыштым шарналтат, шке почеламутышытым лудыт. «Ончыко» журналын редакторжо Б.А. Шамиев кызытсе сылнымутын кузе вияҥмыже, нелалыкым сеҥыме нерген каласкала.
Иван Анисимович Бердинский талантан поэт веле огыл, уста гармончо, фотограф лийын. Тудын йӧратыме шернур вел сем-влакым А.В. Макматов ден Л.И. Мамаева шокталтеныт.
Вашлиймашыш погынышо калыклан Шернур муницпальный район администраций вуйлатышын алмаштышыже А.В. Ямбулатова таумутым каласен.
