Ким Васин лӱмеш Шернур район рӱдӧ библиотекын директоржо И.Г.Кошкинан вуйлатыме книгагудо калыкын кумылын чумыргымо верыш койын савырна. Тышке книгам лудшо-влак веле огыл толыт, тыгак тӱрлӧ вашлиймаш-влак моткоч веселан эртат. 12 октябрьыште тыгай кас лӱмлӧ поэтессе, Марисола кыдалаш школышто марий йылмым да литературым шуко ий туныктен, канышыш лекше, талантан ятыр рвезе ден ӱдырлан сылнымутыш, наукыш, театр да муро искусствыш корным почшо Зинаида Ермакован 75 ияш юбилейжылан пӧлеклалтын ыле.
Самырык, ӱшаныме сомылым кумылын шуктышо пашаеҥ, книгагудын краеведений пӧлкажым вуйлатыше Е.Л.Яшкинан тӱҥалтышыже почеш ямдылыме проект дене ты пайрем кас эртыш. Пагален ӱжмӧ уна-влак коклаште З.Ермакован туныктен лукмо писатель, «Марий книга издательстве» савыктыш пӧртын директоржо Юрий Соловьев ден «Ончыко» журналын редакторжо Борис Шамиев лийыныт. Коктынат пагалыме туныктышыштын да пырля тунемме йолташыштын усталыкшым кӱкшын акленыт, чапле юбилейже дене шокшын саламлен, шерге пӧлекым кучыктеныт. Моло унат лӱмлӧ сылнымут мастарым саламлыме мут, чапле пӧлек дене кумылаҥденыт. Саламлыме шомакым Шернур муниципальный район администраций вуйлатышын алмаштышыже А.В.Ямбулатова ойлен. Юбиляр лӱмеш чапле муро йоҥген.
