Тений слётын цельже тыгайрак улмаш: марий самырык тукым сообщевсте-влакын пашаштым саемден колташ у технологийым кычалаш, нунын социально значимый инициативыштым илышыш шыҥдараш полшаш, слётчик-влакым проектым возаш туныкташ. Программе ончычсо слёт-влак семынак поян: ятыр лекций, семинар, мастер-класс, эксперт-влак дене практический паша, мер пашаеҥ-влак дене вашлиймаш лийын.
Слёт жапыштак грантым пуышо организацийлашке да фондлашке заявкым пуаш йӧрышӧ молодёжный проект-влакым ямдылыме.
Слётын тӱҥ шонымашыже ий гыч ийыш иктак кодеш: марий калыкын шкешамжым, менталитетшым пеҥгыдемдаш.
Эдуард Александров, оньыжа:
– Ондак ме 18–35 ияш-влакым погенна гын, ты гана 14 гыч 25 ияш марте. Вуйлатыше семын кугурак-влакат толыныт. Проект паша – тиде моткочак кӱлешан паша. Ме таче тыште тӱҥалтышым ыштенна гын, ӱдыр-рвезе-влак тиде паша дене умбакыже кугу кумда тӱняшке лекташ тӱҥалыт, шонена.
Слёт жапыште участник-шамычын койышышт, чынак, вашталтеш. Таче вет мемнан тыгай илыш шот: кунамже марла моштат, но кутыраш аптыранат… Сандене тиде слётышто мемнан йылмына – марий. Южыжо коклан рушла кутырен колта. Но паша кышкарыште – марла гына. Икмыняр еҥ уло: марлаже умыла, но ойлен колташ йӧсӧ. Слёт мучашке лишеммылан ынде нунат шке коклаштышт марла ойлаш тыршат – кугешнен. Марла мурат, марла куштат. Чыла тиде менталитетымат, шке ментальностьымат вашталта. Туныктышо, организатор-влак, ӱжмӧ уна-влак коклаште шкешамым савырыше да чоныш пыштыше мут-влак дене мемнан слётчик-влак деке шуктышо еҥ-влак улыт.
Марий самырык тукым слётын учредительже да организаторжо-влак: Марий Эл Республикысе тӱвыра, печать да калык-влакын пашашт шотышто, Самырык-влак политике, спорт да туризм, Туныктымаш да шанче министерстве-влак, Марий Турек муниципал районын администрацийже, Мер каҥаш, «ВийАр» обществе, «Эр вий» йоча организаций, Марий национальный конгресс.
И. Попов
М. Скобелевын да Марий самырык тукым слётын архивше гыч налме фото-влакым кучылтмо