Шернур книгагудын йоча пӧлкаштыже «Кече-Солнышко» журналын юнкоржо-влаклан семинарым эртарыме. Самырык возкалыше-шамычлан тӱҥ редактор Светлана Архипова кӱлешан ой-каҥашым пуэн. Тудо кузе сайракын возаш, могай теме-влакым кычалаш, вуймутым шонаш манын умылтарен. Палыме поэтессе, Россий писатель ушемын йыжыҥъеҥже Зинаида Ермакова шукерте огыл лекше «Наҥгаем поян кеҥежым» книга примереш чонлан лишыл темым ойыраш туныктен ойлен. Чылашт ончылно журналын юнкоржо, 2 номеран Шернур школын тунемшыже, Екатерина Григорьева ӱдыр-рвезе-влаклан шкеж нерген палдарен, мурымат муралтен пуэн. Тыгак Лажъял школын юнкорышт-шамыч шкеныштын возымышт дене палдареныт.
Йоча пӧлкан пашаеҥже Светлана Сергеева тыгай семинарын кӱлешлыкше нерген каласен да йоча-влакым «Кече-Солнышко» журнал дене пеҥгыде кылым кучаш ӱжын.
Светлана Григорьева