Параньга район Кугу Пумарий школышто писатель-влак дене вашлиймаш эртен.

Параньга район Кугу Пумарий кыдалаш школышто писатель-влак дене вашлиймаш лийын. Тунемше-влак деке Россий писатель ушемын членже-влак Игорь Попов ден Эрик Петров, тыгак бард мурызо да самодеятельный композитор Геннадий Григорьев миеныт.

Мутланымаш шочмо йылмын кӱлешлыкше нерген каен, писатель-влак шке усталык корнышт дене палдареныт, Геннадий Григорьев мурым мурен, почеламут-влакым лудын.

Тыгак вашлиймаште погынышо-влак «Марий книга издательстве» савыктыш пӧртын пашаж дене палыме лийыныт, «Ончыко» сылнымутан журнал нерген колыштыныт. Г. Григорьев Марий тӱвыра рӱдер пеленысе «У муро» студий нерген ойлен.

Тунемше-влакат уста улмыштым ончыктен, концерт программым ямдыленыт.

Вашлиймашым эртарен колташ полшымыжлан Кугу Пумарий школын туныктышыжо Татьяна Евгеньевна Лапиналан кугу таум ойлена.