Марий Эл Республикысе национальный президентский школ-интернат пелен «Йылме школ» лингвистический йоча лагерь пашам ышта. Тушко коштшо икшыве-влак лагерь вуйлатышым алмаштыше Эльвира Курочкина дене пырля «Марий книга издательстве» савыктыш пӧртыш унала толыныт. Издательтвын пашаеҥышт йоча-влакым книга, «Кече-Солнышко», «Ончыко», «У сем», «Литера» журнал-шамыч дене палымым ыштеныт. Тыгак Марий Элын калык писательже-влак Анатолий Тимиркаев ден Мария Илибаева, Марий Элын калык поэтше Геннадий Сабанцев, поэт Геннадий Смирнов да журналист Олег Морозюк вашлиймаште лийыныт. Икшыве-влаклан нунын каласкалымышт оҥай лийын, икмыняр йодышым пуэныт, а Дарья Юрьева ден Полина Бирюкова шке возымо почеламутыштым лудыныт.

Россий Федерацийын Общественный палатыштыже йоча прессе нерген мутланыме. Йыргешке ӱстелын темыже «Йоча савыктыме прессе: йодышыжо-влак да умбакыже тӱзланымыже» манын лӱмдалтын. Тудо йоча-влакым аралыме кечылан пӧлеклалтын. Мероприятийым Россий Федерацийын Общественный палатын увер-влак сообществын тӱзландарыме, СМИ да массовый коммуникацийын комиссийже ямдылен. Тудын председательже Александр Малькевич тӱрлӧ темлымаш-влакым каласаш йодын да шкежат йодыш-влак нерген азапланен ойлен. Вет йоча да кугурак ийготанлан лектеден шогышо изданий-влак кушкын толшо тукымлан кӱлешан улыт да илышыште полшен шогат, илыш корнышто йодышыштым рашемдат.

«Юмо игечымат пуэн, пашамат вораҥдарыктен» ойлат калыкыште. Чынак, 1 июнь гыч тӱҥалын, 6 июнь мартен Москосо Йошкар площадьыште сылне игече шоген да «Йошкар площадь» книга фестивальыш мийыше калыкым куандарен. Тиде арнян Российыште эн кугу книга пайрем эртен. Тушто 700 утла мероприятий лийын. Погынышо калык 52 регион гыч толшо 400 утла савыктыш пӧртын книга продукцийыштым ончен, аклен, ужын, налын кертыныт. Тӱҥ площадьыште 12 тематический шатер пашам ыштен. Тушто «Сылнымут», «Йоча литератур», «Российысе регион-влак», «Нон-фикшн», «Электрон книга», «Тоштер корно», «Отечественный историй» да моло-влакат сомылым вӱденыт. Тыге калык писатель, шанчызе, артист, книга автор-влак дене вашлиймаш, лекций, мастер-класс-влак дене паламые лийын. Нунылан концерт лийын. Тыгодым тӱрлӧ муро, почеламут, сылнымут йоҥгеныт.ӱҥӧ

«Сылнымут алмаштыш» Регион кокласе самырык-влакын сылнымут семинарым Пошкырт кундемысе Мишкан селаште эртарен колтышна. Тиде семинар «Путевка в жизнь» йӱкан икымше совет кинофильмыште кумдан палыме Мустафа рольым модшо да шке лӱмжым курымеш чапландарыше киноактер, да марий поэт Йыван Кырлfн шочмыжлан 110 ий темме лӱмеш да Марий Эл Республикын калык писательже Вячеслав Абукаев-Эмгакын шочмыжлан 60 ий темме лӱмеш пӧлеклалтын. Ты гана Мишкан селашке икмыняр районышто марий йылмым тунемше самырык автор-влак, нунын пелен туныктышо, ача-ава-влак погыненыт. Караидель районысо Уткусто школ гыч кажне ийынак тунемше-влак толыт, а Калтаса район икымше гана творческий шӱлышан ӱдыр-рвезе-шамыч миеныт. А теве Краснокам школышто марий йылмым уста туныктышо Сайтиев Сергей Ильич вӱден шога, тудо транспорт амалллан кӧра йоча-влак толын ыш керт, но сылнымутыштым заочный аклыме ужашыш колтеныт.

Коло кокымшо майыште тӱнямбалне кумдан палыме руш писатель, Марий АССР-ын калык писательже, Марий Эл республикын кугыжаныш премийын лауреатше, Советский районысо Чкарино селаште шочын-кушшо землякна Аркадий Степанович Крупняковын шочмыжлан 100 ияш юбилейжым палемдыме. Аркадий Крупняков ятыр исторический да фантастический, кызытсе илышым ончыктышо роман-влакын авторжо, драматург да журналист семын палыме. Книгаже-влакым калык куанен лудеш. «У моря Русского» Симферополь олаште1961 ийыште савыкталтын, «Марш Акпарса» Йошкар-Олаште 1965 ийыште ош тӱням ужын. Эн кугу тираж дене лекше трилогий-книгаже «Гусляры» маналтын («Москва-матушка» , «Вольные города», «Марш Акпарса»). «Есть на Волге утёс» романже 1983 ийыште да «Царёв город» романже 1984 ийыште савыкталтыныт. Тыгак фантастический романже-влак Аркадий Крупняковым кӱшкӧ нӧлталыныт. Тиде «Амазонки» ден «Пояс Ипполиты».

21 майыште «Марий книга издательстве» савыктыш пӧртын пашаеҥже-влак И.С.Палантай лӱмеш республикысе тӱвыра да сымыктыш колледжын студентше да преподавательже-влак дене вашлийыныт. «Ончыко» журналын тӱҥ редакторжо И.Попов, художественный редакторжо Б.Шамиев да ответственный секретарьже Е.Тетерина журналын историйже да тачысе илышыже, книга издательствын пашаже, да тачысе марий сылнымут нерген каласкаленыт. Театральный отделенийын кумшо курсыштыжо тунемше И.Юдин (курыкмарла) ден С.Ведерникова (олыкмарла) уна-влаклан И.Поповын почеламутшым лудыныт. Эше ик студент Д.Смоленцев шке возымо почеламутшо дене сайын ӧрыктарен.

Книжный фестиваль Красная площадб 2019

Тений 1 гыч 6 июнь марте Моско столицынан рӱдӧ площадьыштыже "Йошкар площадь" книга фестиваль ынде визымше гана эрташ тӱҥалеш. Ты гана тиде мероприятий руш кугу писатель А.С.Пушкинын шочмо кечыжлан да руш йылмын Кечыжлан пӧлеклалтын. Площадь Василий Блаженный собор гыч тӱҥалын Исторический тоштер марте угыч книга дене темеш.

2019 ий 15 майыште Марий Элын Т. Евсеев лӱмеш национальный тоштерыштыже палыме прозаик, драматург, журналист, Россий писатель ушемын да Украинысе писатель-влакын национальный ушемыштын еҥже Сергей Крупняков дене усталык вашлиймаш эртен. Тудо “Шонымашын ал мардежоҥжо” маналтын. Мероприятийым унан ачаже, Марий АССР-ын калык писательже да республикысе Кугыжаныш премийын лауреатше А.С. Крупняковын (1919–1994) шочмыжлан 100 ий теммыжлан пӧлеклалтше ончер сынеш эртарыме.

«Сылнымут алмаштыш» IХ Республикысе самырык автор-влакын сылнымут конкурсышт эртаралте. Тудо совет киноактёр, марий поэт Йыван Кырлан шочмыжлан 110 ий темме лӱмеш пӧлеклалтын. Самырык возкалыше-влакым Марий Эл Республикысе тӱвыра, печать да калык-влакын пашашт шотышто министрын алмаштышыже Михаил Матвеев саламлен, возымо пашаште икымше ошкылым ыштыше-шамычлан муролыкышто шке шомакан мастар лийын кушкын шогалаш тыланен. Поро мутым «Ончыко» журналын тӱҥ редакторжо Игорь Попов, «У сем» журналын тӱҥ редакторжо Людмила Ягодарова, «Кече/Солнышко» йоча журналын сылнымут редакторжо Кристина Архипова, «Ямде лий» газетын тӱҥ редакторжо Лидия Семёнова, Россий писатель ушемын йыжыҥъеҥже Эрик Петров ойленыт.

11 апрельыште Шернур поселкысо Тӱвыра полатыште  «Йыван Кырла лудмаш» VI научно-практический конференций эртен. Тудо эртыше да кызытсе саманысе илыш, тӱвыра да туныктымо паша" темылан пӧлеклалтын уле. Тудо чапланыше поэтнан да киноактернан 110 ий теммылан пӧлеклалтын, а ты кугу форумлан тӱҥалтышыжым 10 ий ончыч, шочмыжлан курым теммым палемдыме годым, ыштеныт. Кудымшо научно-практический конференций 300 утла еҥым чумырен. Чылаже 87 докладым колыштмо.