21 мартыште, Тӱнямбал поэзий кечын, Марий книга савыктыш ден Марий Эл Республикысе Россий писатель ушемын региональный пӧлкаже книга-влак пайремым эртарышт. Тудо икмыняр кыдеж гыч шогыш.

Икымше кыдежыште Россий калык-влакын рушлаш кусарыме сылымутыштым иктеш чумырымо «Прозо» антологий дене палымым ыштыме. Тидын годым саламлымаш шомакым Марий Эл Республикысе Тӱвыра, печать да калык-влакын пашашт шотышто министрын алмаштышыже Галина Ширяева, Правительстве вуйлатышын икымше алмаштышыже Михаил Зиновьевич Васютинын секретариатыште вӱдышӧ советник Валентина Гаврилова, Марий кугыжаныш университетын туныктышыжо, филологий наука кандидат Галина Бояринова ойленыт.

«Прозо» альманахыш чылаже Россий Федераций кумдыкышто илыше да серыше 115 авторын сылнымутышт пуреныт. 53 йылме дене возымо да рушлаш кусарыме ойлымаш, повесть гыч ужаш, новелле, илыш гыч сӱрет-влак тӱрлӧ сынан улыт. Тыгай чапле да кӱжгӧ книган нелытше гына — кум килограмм даҥыт, а акше куд тӱжем наре. Тиражше 1500 экземпляр. Альманахыш Российысе калык-влакын йылмышт дене возымо сылнымут коклаште мемнан писатель-влакын произведенийышт чапле верым айла. Марий Элын калык писательже Мария Илибаеван, прозаик Валерий Бердинскийын да Василий Красновын ойлымашышт-шамыч лудшыеҥын чоныштым ылыжтат да шонкалаш таратат. Марий прозо нерген ончылмутым филологий наука кандидат Марианна Владимировна Рябинина возен.

Альманах нерген шке шонымашыштым Марий книга савыктышын директоржо Юрий Соловьев ден писатель ушемым вуйлатыше Светлана Архипова почын пуышт.

Кокымшо кыдежыште самырык поэт, «Ончыко» журналын тӱҥ редакторжо Игорь Поповын «Поч омсатым» почеламут сборникше дене калык ончыко лекте. Ятыр почеламутшо-влак дене поэт лудшыеҥым шке векше савырен, тачысе книгаж дене, келге шонымаш-влакшым мут орлаҥгыш вӱдылын, илыш, йӧратымаш, пӱртӱс, шочмо эл нерген ойла.

Елена Юнусова йоча-влаклан возышо писатель семын палыме. Тудо «Кугезе компьютер» книгаж дене Эстонийыште да тӱнямбалне палыме лие. Йоча писателят шке шонымашыжым келгын почо.

Леон Раян лӱмжӧ кумдан чапланен. «Сокыртага» книгашкыже йоча-шамычлан ойлымаш ден йомак-влак пуреныт. Сӱрет-влакым Мария Клюкина ыштен. Леон Рая тиде книган шочмыж шотышто палдарыш.

Книга пайремыште Максим Вайшеват шкенжым ончыктыш. Тудо Шернур район Марисола кундем гыч, кызыт марий кугыжаныш университетыште шинчымашым пога. Самырык авторын книгаже «Верните в мир мою надежду» маналтеш. Максим почеламут-влакым рушла воза, туныктышыжо – Максимова Светлана Мартыновна. Книган редакторжо Геннадий Смирнов авторын возымо саскажым лончылыш, у кугорныш шогалаш тыланыш.
Шукерте огыл ош тӱням Елизавета Егоркинан «Корнываж» романже куандарыш. Уста писатель книган возалтмыж нерген ойлен пуыш. Тыгак тиде роман нерген «У сем» журналын тўҥ редакторжо Людмила Петровна Ягодарова каласкалыш.

«Ямде лийын» тӱҥ редакторжо Лидия Васильевна Семенова Елизваета Егоркинам у книга лекмыж дене саламлыш да йоча газет редакций лӱм дене пеледыш аршашым кучыктыш. Саламлымашке «Марий Эл» газетын ответственный секретарьже Владимир Козлов ушныш.

«Эрвий» альманахыш ятыр поэт-писательын, тыгак самырык автор-влакын возымышт пуреныт. Нунын коклаште поэтессе Татьяна Соловьеван поэзий саскаже ойыртемалтше улеш. Татьяна погынышо-влакым Поэзий пайрем дене саламлыш да шуко сай, поро мутым ойлыш. Саламлымашке самырык автор Христина Александрова ушныш.

Пайрем сай кумыл дене мучашлалте.

     

  

  

  

  


Светлана Архипова

Авторын фотожо