Сеҥымашын 75-ше идалыкше вашеш
Россий писатель ушем член, Морко район Шлань ялын шочшыжо Роза Салах 82 ий илыме ӱмыржӧ гыч шуко жапшым туныктымо пашалан пуэн, кодшыжым – эртыме илыш корныжым возен кодаш. Тыге Екатеринбург, Нижневартовск олалаште икмыняр книгам савыктен. Пытартыш кок книгажым «Марий книга издательстве» савыктыш пӧрт луктын. Туштыжо шочмо ялжым, тусо калыкын Кугу Отечественный сарын шучко ийлажым кузе чытен лекмыжым келгын ончыктен. «Шлань в годы войны..» рушла возымо книгажым Марий Элын курымаш юбилейжылан да Кугу Сеҥымашын 75 ийжылан пӧлеклен.
Сеҥымашын 75-ше идалыкше вашеш
Россий писатель ушем член, Морко район Шлань ялын шочшыжо Роза Салах 82 ий илыме ӱмыржӧ гыч шуко жапшым туныктымо пашалан пуэн, кодшыжым – эртыме илыш корныжым возен кодаш. Тыге Екатеринбург, Нижневартовск олалаште икмыняр книгам савыктен. Пытартыш кок книгажым «Марий книга издательстве» савыктыш пӧрт луктын. Туштыжо шочмо ялжым, тусо калыкын Кугу Отечественный сарын шучко ийлажым кузе чытен лекмыжым келгын ончыктен. «Шлань в годы войны..» рушла возымо книгажым Марий Элын курымаш юбилейжылан да Кугу Сеҥымашын 75 ийжылан пӧлеклен.
24 февральыште 125 суртан Шлань ял калык изижге-кугужге верысе клубыш погыныш. Тышке нуным у книга дене палдарыме кас шкеж деке ӱжын. Пайрем вашлиймашыш кугу уна-влак: книган авторжо шкеже, «Марий книга издательстве» савыктыш пӧртын директоржо, писатель-прозаик Ю.Соловьев, «Ончыко» журналын редакторжо Б.Шамиев, мурызо-бард Г.Григорьев толыныт. Шерге уна-влакым моткоч шокшын вашлийыныт.
Книгалан презентацийым Унчо ял шотан илем администраций вуйлатыше И.Евсеев почын да кугу пайрем-влаклан кундемыште кузерак ямдылалтме нерген радамын каласкален. Тыште Кугу Сеҥымашын 75 ияш юбилейжылан поснак чот тыршен ямдылалтыт улмаш. Кундемыш пурышо яллаште 45 рвезе элын Пограничный войскаштыже служитлен да иктыш ушнен, ик ой дене шке ушемыштым ыштеныт. Тудым «Акреттӱр» студийын мастар кидан пашаеҥже Иван Гавриловлан вуйлаташ ӱшаненыт. Ик кече ончыч Ачамландым аралыше-влакын кечышт лӱмеш биатлон дене таҥасымашым эртареныт.
– Россий мланде деч ӧрдыжсӧ локальный манме вашпижмашлаште лийше салтак-влакын ушемыштымат ышташ погыненна ыле. Район мучко лӱмдымӧ тыгай сарлаште 60 утла рвезе лийын, – ешара Иван Михайлович.
Ты кундем Кугу Отечественный сарыш 660 чапле рвезе ден ӱдыржым колтен, тышеч 350 еҥже вӱран кредалмаш пасуэш шке вуйжым пыштен. Шукыштын капыштым кушан тойымо, могай мландыште курымаш омо дене малат – пале огыл. Кодшо кечылаште Российысе ик кычалше отряд гыч увер толын: Шлань ялын шочшыжо Еремей Ведаскинович Ведаскинын капшым Смоленск область кундемыште мумо. Кап-влакым тений кеҥежым иза-шольо шӱгарлаш тоят, ты кугу церемонийыш толаш ӱжыт.
Книга дене палдарыме касым вӱдышӧ, Унчо этнокультурный комплексын тоштержым вуйлатыше Людмила Аксюбина мутым шерге уна-влаклан пуа. Вет автор деч посна молыштат книгам, журналым лукмо паша дене кылдалтыныт, «Шлань в годы войны…» савыктышым шочыктымаштат надырышт лийын. Тыгак Кугу Сеҥымаш темым журналлаште кузе почын пуымо нерген радамын каласкаленыт. Мурызо-бард Г.Григорьев Марий тӱвыра рӱдарыште самырык мурызо-влакым ямдылымыж дене палдарен да гитарым шоктен, патриотизм шӱлышан кок мурым марла йоҥгалтарен. Верысе шкешотан артист-влакат крнцертым ямдыленыт. Клуб вуйлатыше Дмитрий Терентьевын тыршымыж дене тыште куштышо да мурышо коллектив-влакым чумыреныт. Нуно тӱрлӧ кундемлаште илыше шочмо калыкнан усталыкшым моткоч мастарын куштен да мурен ончыктеныт. Шкешотан артист-влак Алексей Григорьев, Зинаида Терентьева, Нина Иванова да Унчо школын II классыштыже тунемше Айвика Балезина писатель Роза Салахын произведенийже почеш интермедийым ямдылен, сценыш луктыныт.
Пытартышлан клуб тич калык сареш колышо Шлань ял марий-влакын лӱмыштым кинопроектор гоч ончыктымым кынел шогалын, вуйым савен вашлийын. Кумылым волтышо, но элын тынысшым аралаш ӱжшӧ неле спискыште 74 еҥын лӱмжӧ, ачалӱмжӧ да тукым лӱмжӧ койыныт.
Ю.Косатан, Б.Редькин
Ю.Косатан,
Б.Редькин