Зоя Богданова. Шыжымат пеледыш пеледеш: повесть, ойлымаш, шарнымаш.
Тиде повестем, творческий пашаштем кумылаҥден, ӱшаным пуэн шогышо, уста возышо, чылалан палыме да пагалыме Мария Каликаевна Илибаевалан пӧлеклынем ыле… Но шучко чер тудын ӱмыржым лугыч ыштыш. Тугеже тиде мутсаскам тудым шарныме лӱмеш лийже.
Тыге тӱҥалеш шке книгажым Зоя Семеновна Богданова да лудшын кумылжым тыманмеш савыра.
Автор возымаштыже кугу да поян илыш опытшылан эҥертен, марий йылмын поянлыкшым устан кучылтын, ешыжын да родо-тукымжын илыш пӱрымашышт гоч эртыше саманын нелылыкшым да суаплыкшым ончыктен. Марий калыкын шуаралтме корныжым шке илышыж гоч мастарын почын пуэн.
Книга Зоя Семеновнан 90 ияш лӱмгечыжлан пӧлеклалтын. Марий книга издательстве савыктыш пӧрт тудым 250 экземпляр дене луктын. Марий сылнымутым йӧратыше кажне айдеме авторын мутсаскаж дене палыме лийын кертеш.
Вероника Корчемкина. Авамын ваштарже: почеламут, поэме, муро, басне.
Вероника Корчемкина лудшылан туныктышо, шке возымыжым йоҥгалтарыше мурызо семын палыме. XX курымын 90-ше ийла мучаште лекше «Ачамлан», «Рошто», «Танюшем» муро-влакше калык чоныш келгын шыҥен пуреныт да тачат илат. Ныжыл саман да лирик сынан почеламут корнылаштыже автор шочмо мландыжым, калыкшым, сылне пӱртӱсшым, ешын да йӧратымашын вийжым чапландара. Проста йылме дене возымо да тунамак келге шонымашан поэзийже поро чонан, икте-весе деке тӱткӧ лияш, жапыштыже полыш кидым шуялташ ӱжеш. Тыгак тудо илышын ыҥже, айдемын аклыкше нерген шонкала да лудшымат тидланак тарата. Марий калыкын нелын эртыме илыш корныжо, пиалан йоча пагытше нергенат тургыжланен да куанен воза. Мыскара шӱлышан шкешотан савыртыш-влакше возышын пашажым утыр сӧрастарат да шыргыжалаш кумылым луктыт.
Книган тиражше – 200 экземпляр.
Валерий Кульшетов. Музыкальный калейдоскоп: сборник пьес для фортепиано.
Музыкальный школышто, ссузышто, вузышто тунемше да туныктышо-влаклан, пианино дене шокташ кажне шӱман музыкантлан келшыше пьесе-влак аршашышке кумдан палыме композитор Валерий Кульшетовын (17.10.1952 – 02.10.2022) тӱрлӧ жанран да нелытан произведений-влакшым пуртымо.
Книгам Марий книга издательстве Марий Эл Республикын «2013 – 2030 ийласе жаплан Марий Эл Республикын кугыжаныш национальный политикыже» кугыжаныш программыж почеш 200 экземпляр дене савыктен.
Белая лебёдушка: марийские народные сказки.
«Ший пӱан Ший Пампалче», «Нӧнчык-патыр», «Парнякай», «Кокшавуй», «Нылле ик шоя» да моло йомак-влакым руш йылме дене луднеда гын, тиде книга лач тыланда келшен толеш!
В.Б. Муравьевын, А.Ф. Смоликовын, А.Я. Спиридоновын кусарыме да сылнылыкым пуртен серыме тӱрлӧ сынан йомак-влак йоча-шамычланат моткоч оҥай да пайдале лийыт. Адакшым мастар сӱретче-влакын С.В. Адиятуллинан, О.В. Байнован, Г.В. Тайгильдинын, И.А. Шехурдинан сылне деч сылне пашаштат икшывым книгам ончаш кумылаҥдат.
«Белая лебёдушка» йомак-влак книгам «Марий книга издательстве» савыктыш пӧрт 1000 экземпляр дене луктын.
Карло Визинтини. Путешествие из Флоренции в Йошкар-Олу, или невероятные приключения итальянца в России.
Итальян серызе, тале мурызо Карло Визинтини руш йылме дене серыме книгам Марий книга издательствыште луктын! Мо нерген вара тудо возен? Палаш оҥай? Тугеже, лудса умбакыже… «…Книгаштем ала-могай идеалым ида кычал, тушто иктым гына кычалза – чонемым…» Чынжымак, тыште авторын кумда Россий мучко мом ужмыжым, чонеш кодшо шижмашым, вашлиймашым, илыш тат-влакым ужын, муын кертыда. Илыш гыч налме тӱрлӧ фотосӱрет-шамыч книгам эше утларак сылнештарат.
Книган тиражше – 300 экземпляр.