Кок ийлан ик гана самырык автор-влаклан «Сылнымут шыже» семинар-совещаний эртаралтеш. Ты гана тудо 6 октябрьыште, марий литературын классикше Сергей Григорьевич Чавайнын шочмо кечынже, эртаралте. Ты гана ме тудым Марий Эл Республикын калык писательже Алексей Федорович Красноперовын 100 ияш лӱмгечыжлан пӧлеклышна. Чыланат тиде лӱмлӧ писательын «Страда» романжым сайын палат. Тудым школыштат шымлат, студент-влакат тунемыт. Тыгак писательын ятыр моло произведенийжат лудшыеҥ-шамычлан палыме: «Трубка комбата», «Сыновья», «Дальние зарницы» да молат. Тыге ме Алексей Красноперовым шарналтен, тудын суапле пашаже калыкыште кӱлешан манын палдарымым – поро сомыллан шотлена.
Кок ийлан ик гана самырык автор-влаклан «Сылнымут шыже» семинар-совещаний эртаралтеш. Ты гана тудо 6 октябрьыште, марий литературын классикше Сергей Григорьевич Чавайнын шочмо кечынже, эртаралте. Ты гана ме тудым Марий Эл Республикын калык писательже Алексей Федорович Красноперовын 100 ияш лӱмгечыжлан пӧлеклышна. Чыланат тиде лӱмлӧ писательын «Страда» романжым сайын палат. Тудым школыштат шымлат, студент-влакат тунемыт. Тыгак писательын ятыр моло произведенийжат лудшыеҥ-шамычлан палыме: «Трубка комбата», «Сыновья», «Дальние зарницы» да молат. Тыге ме Алексей Красноперовым шарналтен, тудын суапле пашаже калыкыште кӱлешан манын палдарымым – поро сомыллан шотлена.
«Сылнымут шыже» семинар-совещанийым самырык автор-влакын апшаткудыжо манаш келшен толеш. Тудым эртарен колтымашке Марий Эл писатель ушем, Марий Эл Тӱвыра, печать да калык-влакын пашашт шотышто министерство кугу надырым пыштат. Тиде гана Министр Константин Анатольевич Иванов чыла самырык писатель-влаклан творческий сеҥымашым тыланен ойлыш.
Самырык автор-влаклан пӧлеклалтше мероприятийын вияҥ толмо корныжым да вораҥдарыме сомылжым ончалаш гын, тудо чапле лектышан лийын. Тыгай погынымаш икымше гана 1974 ийыште шке йырже самырык возкалыше-влакым чумырен. Тудо республикыштына у талантым кычалме да лӱмлӧ мутмастар-влак дене, тыгак сылнымутышт дене палыме лийме, умбакыже мастарлыкым шуараш тӱҥалме амал дене шочын. Тудым сылнымутышто икымше ошкылым ыштыше автор-шамычын усталык школышт семынат палемдаш лиеш. Тыгай семинар-совещаний Марий Эл Республик, тунам МАССР лийын, кӱкшытыштӧ 1976 ийыште эртаралташ тӱҥалын. Лач тунам «Творческий молодёжь дене пашам ыштыме нерген» документ илышыш шыҥдаралтын. Тиде жапым ончен, ты гана ме семинар-совещанийым эртараш тӱҥалмылан 45 ияш лӱмгечым палемдышна. «Сылнымут шыже» гоч ятыр лӱмлӧ поэт-писатель эртен да сылнымут олыкышто шке вержым муын, шке литератур апшаткудыжым почын. Кызыт марте нуно мутпоянлык сомылыштым посна книга дене савыктен луктыныт да палыме еҥыш савырненыт. Тачысе Россий писатель ушем член-влак: Зинаида Ермакова, Юрий Соловьев, Зоя Дудина, Альберт Васильев, Анатолий Тимиркаев, Анатолий Спиридонов, Алевтина Сагирова, Геннадий Сабанцев, Эрик Петров, Леон Рая, Елена Юнусова да молат республикыштына веле огыл, Российыштат, финн-угор тӱняштат палыме улыт. Шукын Кугыжаныш премийын лауреатше лийыныт.
Ты ганат самырык возкалыше-влаклан вич секций пашам ыштен. Тиде – марий поэзий, марий прозо, руш поэзий ден руш прозо иквереш, курыкмарий сылнымут да йоча литератур. Нуным кумдан палыме поэт-писатель-влак вӱденыт. Марий самырык поэт-влак дене Альберт Васильев, Игорь Попов, Лидия Иксанова, Зинаида Ермакова, Зоя Дудина, прозаик-влак дене Анатолий Ишалин, Эрик Петров, Валерий Бердинский, Юрий Соловьев пашам ыштеныт. Руш сылнымут мастар-влак пелен Елена Хисамутдинова, Сергей Щеглов, Павел Шулепов, Сергей Шелепов лийыныт. «Йоча сылнымут» секцийыште Елена Юнусова ден Кристина Архипова пашам вораҥдареныт. Курымарий сылнымут заочно лийын. Тушто сылнымутым возкалыше-влакын серымыштым Людмила Ягодарова, Надежда Федосеева, Елизавета Егоркина акленыт. Секций вуйлатыше-влак ой-каҥашыштым кажнын шӱм-чоныш шукташ тыршеныт, автор-шамычын кумылышт нӧлтшӧ да шулдырышт вияҥже манын, у корным темленыт. Погынымаш годым самырык-влак икте-весышт дене палыме лийыныт, тыгак лӱмлӧ поэт-писатель-шамычым ужын мутланеныт. Тидын годым кажне авторым у корныш шогалмыж дене саламлыме да возымаштыже сай могыржым палемдыме.
С. Архипова
