Б. Редькин
Шуко тӱрлӧ йылме дене мутланыше ныл миллион утла еҥ илыман Башкортостан Республикын ик лукыштыжо — Краснокам район Коян селаште марий-влакат ик еш гай келшен илат, пашам ыштат, икшывым ончен куштат, тунемыт. Каненат моштат…
Б. Редькин
Шуко тӱрлӧ йылме дене мутланыше ныл миллион утла еҥ илыман Башкортостан Республикын ик лукыштыжо — Краснокам район Коян селаште марий-влакат ик еш гай келшен илат, пашам ыштат, икшывым ончен куштат, тунемыт. Каненат моштат. Тысе мотор культур полатыште ыштыше «Таныптӱр сем» этнофольклор ансамбль руш, татар да марий-влакым шке усталыкше дене эре куандара. Культур илышым нимо деч кӱшкӧ шындыше чолга ӱдырамаш Ольга Исинбаеван вуйлатыме коллективын лӱмжӧ финн-угор йылмыла дене мутланыше калык-влакын илыме чыла кундемыштат сайын палыме. Теве ынде чапланыше коллективын эртыме усталык корныжлан пӧлеклыме «Таныптӱрын семже» книга савыкталтын. Тудым ты селаштак илыше туныктышо-ветеран Михаил Данилов возен, «Калтаса ӱжара» марла газет редакцийын типографийыштыже луктын.
Книга дене палдарыме лӱмеш Коян селасе культур полатыште кугу пайрем эртен. Тушко мийыше шуко уна коклаште Марий Эл гычат пагален ӱжмӧ еҥ-влак лийыныт. Тиде — «Ончыко» журналын редакторжо Борис Шамиев ден Марий культур рӱдерын пашаеҥже, артист да радиожурналист Сергей Карпов. Пеленышт шагал огыл пӧлекым намиеныт.
Культур полатыштак верлаште модельный библиотекыште у книга дене палдарымаш-презентацийым районын онаеҥже Виталий Искаков почын да шерге уна-влак дене умбакыже палдарен. Кугу пайремыш муниципальный районын культур пӧлкажын начальникше Эльвира Махатаева, ветеран советын вуйлатышыже Ольга Степкина да «Камские зори» район газетын тӱҥ редакторжо Ирина Валеева толыныт, писательын пашажым кӱкшын аклен ойленыт, шкешотан коллективым тыгай кӱкшытыш лукмыжлан тауштеныт, пӧлекым кучыктеныт.
«Таныптӱр сем» ансамбльлан негызым пыштыше да кызыт мартеат устан вуйлатыше Ольга Исинбаева коллективын тачысе чурийже дене палдарен да шкешотан артист-влаклан чыла семынат полшымыжлан район администрацийлан кугу таум каласен.
— Кызыт марте шке кӱшеш 10 книгам луктынам. Тидыжым эн йӧратен да эн яндар шонымаш дене возенам. Вет артист-влак дене пырля коштынам, пырля кушкынам. Ончыкыжымат у книга дене куандараш шонем, — ойлен туныктышо-писатель. Тудлан Коян села администраций вуйлатыше Валерий Созыкин лӱмын ямдылыме пӧлекым кучыктен.
Книга дене палдарыме кугу пайрем кас чапле концерт дене пытен. Тӱрлӧ вургеман, но ик шонымаш — келшымашым моктышо, тудым вияҥдымашке, пеҥгыдемдымашке виктаралтше мурымаш-куштымаш программым лишыл марий яллаште ыштыше шкешотан коллектив-влак пойдареныт. Эн кугу таум 150 километр ӧрдыжтӧ илыше Мишкан район Монар ял гыч толшо «Ший памаш» фольклор ансамбльлан каласеныт. Нуно шкешотан семпогышт дене зал калыкым чотак куандареныт.
У книга дене палдарыме лӱмеш пайремым эртараш полшымыштлан культур пӧрт директор Лилия Султановалан, книгагудо вуйлатыше Гузель Рамазановалан да библиотекарь Валентина Зайнетдиновалан кугу таум каласеныт.
