Марий Элнан Юлсер кундемже ятыр лӱмлӧ шочшыж дене чаплана. Нунын коклаште поэт да журналист Вадим Илларионоват шке волгыдо вержым налеш. Чаманаш веле перна, тиде уста еҥ ош тӱня гыч пеш вашке каен. Ила гын, тений тудлан кудло ий темеш ыле, а чеверласенже тудо 1995 ий кеҥежым.
Марий Элнан Юлсер кундемже ятыр лӱмлӧ шочшыж дене чаплана. Нунын коклаште поэт да журналист Вадим Илларионоват шке волгыдо вержым налеш. Чаманаш веле перна, тиде уста еҥ ош тӱня гыч пеш вашке каен. Ила гын, тений тудлан кудло ий темеш ыле, а чеверласенже тудо 1995 ий кеҥежым.
Но айдеме тунар ила, кунар тудым ош тӱняште улшо-влак шарнаш тӱҥалыт. Тудын нерген лӱмешыже почмо чапоҥат у тукым-влаклан эреак ушештарен шогаш тӱҥалеш гын, эшеат сай. Тыгай оҥам 29 июньышто Волжский районысо Ӱлсола ялыште почмо. Тудым ты ялын чолга шочшышт: ача ден эргыже Вадим Васильевич ден Эдуард Вадимович Илларионовмыт лӱмеш нунын шочмо сурт пырдыжеш сакыме.
Вадим Илларионов уста поэт да журналист семын сай кышам коден, а Эдик эргыже Озаҥыште пожарныйлан служитлен. Икмыняр ий ончыч ты олаште ик кугу пожар лийме годым тудын вуйлатыме караул эн ончыч йӧрташ толын шуын, но Эдик тул озыркан дене вашпижмаште вуйжым геройла пыштен. Колымекше, тудым Патырлык орден дене палемдыме…
Ача ден эрге Илларионовмытлан шарнымаш оҥам ямдылымаште Волжский район администрацийын тӱвыра пӧлкаже тыршен, В. Илларионовын пелашыже, Фаина Сергеевна, шке кумыл надыржым пыштен. Лӱмоҥам почмашке Волжский район администраций гыч, Йошкар-Ола гыч уна-влак, Озаҥысе пожарный часть гыч Э. Илларионовын шуко-шуко паша йолташыже толыныт ыле; вет ты частьын спискышкыже тудын лӱмжым курымешлан вераҥдыме. Чыланат шокшо, чон гыч лекше мутым ойленыт, Илларионовмытын ешыштлан да пошкудыштлан тау мутым каласеныт.
Вадим Илларионов шочмо вершӧржылан пӧлеклыме ик почеламутыштыжо возен:
Омо таче кумылемым нӧлтыш –
Пуйто мӧҥгӧ миенам адак.
Кукмарий кундемым нальым ӧлтыш
Да шупшальым шокшын авамлак…
Кукмарий кундемысе Ӱлсола ялат мондаш лийдыме шочшыжо-влаклан тыгаяк шокшо йӧратымаш дене вашешта.
Геннадий Сабанцев
