Шернурысо Ким Васин лÿмеш рÿдö книгагудо тиде кечым районысо библиотеке пашаеҥ-влак чот вученыт. Вет тышке «Марий книга издательстве» савыктыш пöртын пашаеҥже-влак толаш сöреныт. 24 ноябрь эрдене вучен шуктышт. Тышке уна-влак — савыктыш пöртын директоржо, ты кундемысе Купсолаште шочын-кушшо лÿмлє писатель Юрий Соловьев, «Ончыко» журналын тÿҥ редакторжо, поэт Игорь Попов да ты журналын редакторжо Борис Шамиев толыныт. Пеленышт республикыштына сайын палыме семмастар-бард Геннадий Григорьевымат конденыт. Лач тудо гитар дене шоктымыж почеш чапле муро-влакым йоҥгалтарыш.
