Сылнымут аланыште, наукышто, искусствышто пале кышам кодышо эргыж ден ӱдыржӧ-влакым шочмо калыкна нигунам ок мондо. 2018 ий тыгай еҥ-влакын шукыштын «йыргешке» лӱмгечыштлан поян. Иктыже – сылнымут историйыште поэт семын палемдалт кодшо Морко марий Аркадий Иванович Букетов. Да тудын фамилий мучашыш – Сайн кокымшо лӱмым тушкалтен пуымыж деч вара Букетов-Сайн семын палат. Эше теве мом ешарыман: тудо СССР (кызыт Россий) писатель ушем член огыл ыле. Туге гынат газет редакцийлаште шуко жап тыршен ыштымыжлан тудым «Марий Эл Республикын заслуженный журналистше» чап лӱм дене палемдыме. Чылаже вич почеламут сборникшым лукмо. Шочмыжлан 6 январьыште 85 ий темын. Тудо кызыт мемнан коклаштына уке. Но поро еҥым шарнымаш ила. Тидым пеҥгыдемдыш Морко район Кугу Шале тӱвыра пӧрт да модельный книгагудо пашаеҥ-влакын тыршен эртарыме шарнымаш касышт.
Февраль 2018
Калкы шӱмыштӧ курымлан кодеш
Миклай Казаков… Николай Иванович Казаков… Поэт да Айдеме. Тиде кок мутшымат мый кугу буква дене серыде ом керт. Поэт семын тудо марий поэзий шомакым кугу Совет Ушем мучко, тудын деч ӧрдыжкат шочмо марий мландыжын, калыкшын пуымо усталык вийже дене эн ончыч суаплын шарен. Айдеме семынат тудо пеш тыматле, поро, еҥым пагалыше лийын. Мый, мутлан туддеч нылле ийлан самырык улам. Туге гынат, Николай Иванович кажне гана вашлийме годым эреак кумылын пелештен, вуйым савалтен але кидым гына кучен эртен каен огыл, а чарналтен шогалын, тидым-тудым йодыштын, серыме паша нерген умылкален…