Шочмо вер!
Тый угыч тӧр йолгорным шаре,
Изи годсо семынак мыйым ӱж пасуш!..
Ший гай турий муро ден чоным куандаре,
Йымыжан пуалже шӱргышкем эр юж…
Поэт Геннадий Ояр шочмо вершӧржылан чон гыч лекше ятыр шокшо мутым пӧлеклен. Нине корно-влак тудын усталык пашажын тиде йыжыҥжылан шкешотан символ семынат лийын кертыт. Кызыт кеҥеж огыл, пасуат уржа толкын дене ок лӱҥгалт, но торасе самырык жап годымак чоныш вочшо сӱрет авторын чоныштыжо идалыкын кеч-могай жапыштыжат ок йом.